​ឥណ្ឌា៖ ក្រសួងសុខាភិបាល​ឥណ្ឌា​បាន​និយាយ​កាលពី​ថ្ងៃ​ពុធ​ថា ​ប្រទេស​នេះ​កំពុង​ជួបប្រទះ​ការ​កើន​ឡើង​ខ្ពស់​ករណី​ឆ្លង​វីរុស COVID-19។ ទោះជា​យ៉ាងណាអ្នក​ជំនាញ​មាន​ទំនុក​ចិត្ត​ថា ពេលបច្ចុប្បន្ន​នេះ​ប្រទេស​ឥណ្ឌា​បាន​ត្រៀមខ្លួន​បាន​ល្អ​ប្រសើរ​ជាង​ពេលមុន នៅពេលដែល​វីរុស​ប​ម្លែ​ង​ខ្លួន​ថ្មី Delta បាន​គ្របដណ្ដប់​លើ​មន្ទីរពេទ្យ​កាលពី​ឆ្នាំ២០២១​។​

​ប្រទេស​នេះ​បាន​រាយការណ៍​ពី​ករណី​ឆ្លង​វីរុស COVID-19 ថ្មី​ចំនួន ២៤១,៩៧៦​ករណី ហើយ​ករណី​ជា​មធ្យម​រយៈពេល ៧ថ្ងៃ​កន្លងទៅនេះបាន​កើនឡើង​ពី​ប្រមាណ ១៤,០០០ករណី​នៅ​ថ្ងៃទី​១ ខែមករា ដល់​ជាង ១៣០​,០០០​ករណីនៅ​ថ្ងៃទី​១០ ខែមករា ខណៈ​ប្រទេសឥណ្ឌាមាន​ករណី​ឆ្លង​វីរុស COVID-19 សរុប ៣៦,៣១២,៤៨៦ករណី និង​មាន​អ្នកស្លាប់​កើនឡើង​ដល់ ៤៨៤,៧៤០​នាក់​។​ ​យោងតាម​ក្រសួងសុខាភិបាល​របស់​ប្រទេសបាន​ឲ្យ​ដឹងថា ការកើនឡើង​នេះកំពុង​ត្រូវបាន​ជំរុញ​ដោយ​ការកើនឡើង​ឆាប់រហ័ស​នៃ​ករណី​វិជ្ជមាន និង​ការឆ្លង​ប្រចាំថ្ងៃនៅក្នុងរដ្ឋ​ដូចជា Maharashtra, West Bengal, Delhi, Uttar Pradesh និង Tamil Nadu​។ ករណីឆ្លង​វីរុស COVID-19 បាន​កើនឡើង​នៅក្នុង​ខែមីនា​ឆ្នាំមុនដោយមាន​តិចជាង ១% នៃ​ចំនួនប្រជាជន ១.៤ពាន់​លាន​នាក់​របស់​ប្រទេស​ឥណ្ឌា​បាន​ចាក់​វ៉ាក់សាំង​ពេញ​លេញ​​។​

​យោងតាម​ទិន្នន័យ​របស់​សាកលវិទ្យាល័យ Johns Hopkins បាន​ឲ្យ​ដឹងថា បច្ចុប្បន្ននេះមានតែ​ជាង ៤៦% នៃ​ចំនួន​ប្រជាជន​របស់​ប្រទេស បាន​ចាក់​វ៉ាក់សាំង​ពេញលេញ។​ ​ប្រទេស​ឥណ្ឌាបានចាប់ផ្តើម​ចាក់​វ៉ាក់សាំង​បង្ការ​ដល់​កុមារ​មាន​អាយុ​ចាប់ពី ១៥​ឆ្នាំ​ឡើងទៅ ហើយ​កំពុង​ចាក់​វ៉ាក់សាំង​ដូ​ស​ទី៣ សម្រាប់​បុគ្គលិក​ជួរមុខ និង​ប្រជាជនមាន​អាយុ​លើស​ពី ៦០​ឆ្នាំ៕

អត្ថបទ៖ ប៊ុនថន