​ស្នូកឃ័រ៖ ជើងឯក​ស្នូកឃ័រ Masters ៧សម័យ Ronnie O’Sullivan បាន​បន្តដំណើរ​ឡើង​វគ្គ ៨នាក់​ចុងក្រោយ​នៃ​ការប្រកួត​ជើងឯក Masters ក្រោយ​យកឈ្នះ​មិត្ត​រួម​ជាតិ​អង់គ្លេស Jack Lisowski ៦-១ហ្វ្រេ​ម​។ ​​ចាប់ផ្តើម​ដំណាក់កាល​ដំបូង O’Sullivan បាន​នាំមុខ ៣-១ ហ្វ្រេ​ម​មុន​តាមរយៈ​ការ​វាយ​មួយ​ឈើ ៨៦ពិន្ទុ និង ៦៣ពិន្ទុ​។ ​​ក្រោយមក​ក៏​មិន​ងាកក្រោយ​ដែរ​បន្ទាប់ពី​វាយ​មួយ​ឈើ ១២៧ពិន្ទុ​ទៀត​រហូត​យកឈ្នះ ៦-១ហ្វ្រេ​ម​។

​​ជ័យជំនះ​នេះ Ronnie O’Sullivan បន្ត​ឡើង​វគ្គ ៨នាក់​ចុងក្រោយ​ដោយ​ជួប​ជាមួយ​កីឡាករ​អូស្ត្រាលី Neil Robertson ដែល​ធ្លាប់​ឈ្នះ​ជើងឯក​នៅទីនេះ​ឆ្នាំ២០១៣​។ ​​ងាក​មក​កីឡាករ​អង់គ្លេស​មួយរូប​ទៀតគឺ​កីឡាករ​ជើងឯក​ពិភពលោក និង​លេខ ១ ពិភពលោក Mark Selby បាន​យកឈ្នះ​កីឡាករ​ស្កុ​ត​ឡេ​ន Stephen Maguire ៦-៣ហ្វ្រេ​ម​ដើម្បី​ឡើង​ជុំ​បន្ត​ផងដែរ​។ ​​ចាប់ផ្តើម​ហ្វ្រេ​ម​ដំបូង​កីឡាករ​ទាំងពីរ​ត្រូវ​ប្រើពេល​ដល់​ទៅ ៥០នាទី​ទើប​រក​ចាញ់ឈ្នះ​បាន​ ខណៈ​ការប្រកួត​បញ្ចប់ហ្វ្រេ​ម​ទី៤ ស្មើគ្នា ២-២ហ្វ្រេ​ម​។​ ​​ក្រោយមក Mark Selby គ្រប់គ្រង​ការប្រកួត​បាន​ទាំងស្រុង​ដោយ​យកឈ្នះ ៣ហ្វ្រេ​ម​ផ្ទួនៗ​ និង​បន្ត​ឈ្នះ​ជាមួយនឹងលទ្ធផល​ចុងក្រោយ ៦-៣ហ្វ្រេ​ម​។ ​វគ្គ ៨នាក់​ចុងក្រោយ Mark Selby នឹង​បន្ត​ជួប​ជាមួយ​មិត្ត​រួម​ជាតិ​អង់គ្លេស Barry Hawkins៕

​អត្ថបទ​៖​នាង សុភា​វុ​ធ