ប្រធានាធិបតីសហរដ្ឋអាមេរិក លោក Donald Trump បានសម្រេចបណ្តេញស្នងការការិយាល័យស្ថិតិការងារ (BLS) នៃក្រសួងការងារ លោកស្រី Erika McEntarfer កាលពីថ្ងៃសុក្រ (ទី១ ខែសីហា) បន្ទាប់ពីទិន្នន័យ បានបង្ហាញពីកំណើនការងារទាបជាងការរំពឹងទុក នៅក្នុងខែកក្កដា និងការកែសម្រួលធ្លាក់ចុះយ៉ាងខ្លាំង ចំពោះតួលេខការងារ កាលពី ២ខែមុន។

លោក Trump បានចោទប្រកាន់លោកស្រី McEntarfer ដែលត្រូវបានតែងតាំងដោយអតីតប្រធានាធិបតី លោក Joe Biden ថា បានក្លែងបន្លំតួលេខការងារ។ មិនមានភស្តុតាងណាមួយឡើយ ដើម្បីគាំទ្រដល់ការអះអាងរបស់លោក Trump អំពីការរៀបចំទិន្នន័យដោយ BLS នេះ ដែលជាទីភ្នាក់ងារស្ថិតិចងក្រងរបាយការណ៍ការងារដែលត្រូវបានតាមឃ្លាំមើលយ៉ាងដិតដល់ ព្រមទាំងទិន្នន័យនៃតម្លៃរបស់អ្នកប្រើប្រាស់ និងអ្នកផលិត។

សេដ្ឋកិច្ចអាមេរិក បានបង្កើតការងារត្រឹមតែ ៧៣.០០០កន្លែងប៉ុណ្ណោះ ក្នុងខែកក្កដា។ ទិន្នន័យ សម្រាប់ខែឧសភា និងមិថុនា ត្រូវបានកែសម្រួលយ៉ាងខ្លាំង ដើម្បីបង្ហាញពីការបង្កើតការងារបានចំនួន ២៥៨.០០០កន្លែង ដែលទាបជាងការរាយការណ៍ពីមុន។

លោក Trump បានលើកឡើងតាមរយៈបង្ហោះសារនៅលើបណ្ដាញសង្គម Truth Social ថា៖ «យើងត្រូវការតួលេខការងារដែលមានភាពត្រឹមត្រូវ។ ខ្ញុំបានណែនាំដោយផ្ទាល់ឲ្យក្រុមរបស់ខ្ញុំបណ្តេញអ្នកដែលត្រូវបានតែងតាំងដោយលោក Biden ភ្លាមៗ។ លោកស្រីនឹងត្រូវបានជំនួសដោយនរណាម្នាក់ដែលមានគុណសម្បត្តិ និងសមនឹងតួនាទីនេះជាង»។

BLS មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ។ ហើយលោកស្នងការរង William Wiatrowski នឹងបម្រើការជាស្នងការស្តីទី៕