កោះកុង៖ ប្រជាពលរដ្ឋរស់នៅភូមិជីត្រេះ ឃុំអណ្តូងទឹក មួយចំនួនធំលែងចូលកាប់វល្លិ៍ផ្តៅក្នុងព្រៃដូចមុនហើយ ដោយពួកគាត់ងាកមកដាំដុះបន្លែបង្ការ និងចិញ្ចឹមត្រីអណ្តែងជាលក្ខណៈគ្រួសាររកចំណូលមកផ្គត់ផ្គង់ជីវភាពគ្រួសារ។
បន្ទាប់ពីមានការយល់ដឹងពីបច្ចេកទេសដំដុះបន្លែ ស្ពៃ ខាត់ណា ត្រសក់ និងសណ្តែកគួរ ពីអង្គការដៃគូសហការជាមួយមន្ត្រីការិយាល័យកសិកម្មនិងធនធានធម្មជាតិស្រុកបុទុមសាគរ ពលរដ្ឋជាកសិករ នៅភូមិជីត្រេះ ឃុំអណ្តូងទឹក ទទួលប្រាក់ចំណូលឥតដាច់ថ្ងៃនោះទេ ខណៈប្រឹងប្រែងយកចិត្តទុកដាក់ថែទាំ៣ទៅ៤ខែកន្លងទៅ។
អ្នកស្រី ឡាយ ពៅ អាយុ៣៦ឆ្នាំ និងអ្នកស្រី អាង គឹមម៉ា អាយុ៣៧ឆ្នាំ ជាកសិករនៅភូមិជីត្រេះ រៀបរាប់កាលពីថ្ងៃទី៩ ខែមករា ឆ្នាំ២០២២ថា ៤ទៅ៥ឆ្នាំមុន អ្នកស្រីនិងគ្រួសារតែងអាស្រ័យអនុផលព្រៃឈើតាមរយៈចូលព្រៃកាប់វល្លិ ឬផ្តៅលក់ ហើយការងារនោះពិតជាពិបាកងាយប្រឈមនឹងគ្រោះថ្នាក់ ព្រមទាំងវិធានការច្បាប់។
កន្លះខែទើបមកផ្ទះតំណាងកសិករបន្ថែមថា ដោយមើលឃើញពីភាពលំបាកទំរាំបានប្រាក់មកចិញ្ចឹមគ្រួសារ ដែលតម្រូវឱ្យចេញឆ្ងាយពីលំនៅដ្ឋានកន្លះខែទើបមកផ្ទះម្តងយ៉ាងដូច្នេះ ទើបឆ្នាំ២ចុងក្រោយនេះ អ្នកស្រីក៏បានចាប់អារម្មណ៍ទៅទទួលយកការអប់រំណែនាំពីវិធីសាស្ត្របច្ចេកទេសដាំដុះបន្លែត្រីសាកល្បងជាលទ្ធផលទទួលដូចបំណង។
នៅឆ្នាំ២០២៤ការអនុវត្តគម្រោងដាំដុះបន្លែបង្ការនិងចិញ្ចឹមត្រីអណ្ដែងនឹងបញ្ចប់ តែទោះយ៉ាងណពួកគាត់អះអាងថានឹងបន្តបង្កបង្កើនផលកសិកម្មបន្តទៀត។
អ្វីដែលកសិករនៅភូមិជីត្រេះកំពុងប្រមូលផលរួមមាន៖ ផ្លែត្រសក់លក់បានក្នុង១គីឡូក្រាម២៥០០ទៅ៣០០០រៀល ខាត់ណា១គីឡូក្រាម៨០០០រៀល សណ្តែងគួរ ១គីឡូក្រាមថ្លៃ២៥០០ទៅ៣០០០រៀល រីឯត្រីអណ្តែងវិញ ១គីឡូក្រាមថ្លៃ៧០០០រៀលឡើងទៅ។
ជាក់ស្តែងពលរដ្ឋអាចរកចំណូលប្រចាំថ្ងៃបានពី៥០០០០រៀលទៅ១០ម៉ឺនរៀល ពោល គឺតាមទំហំផ្ទៃកសិកម្មរបស់ប្រជាកសិករម្នាក់ៗ។ លោក នាង ពិសិដ្ឋ អនុប្រធានការិយាល័យកសិកម្ម ធនធានធម្មជាតិ និងបរិស្ថានស្រុកបូទុមសាគរ បានឲ្យដឹងដែររសៀលថ្ងៃទី១៣ ខែមករានេះថា គម្រោងបណ្តុំកសិកម្មសហគមន៍នេះ ធ្វើឡើងដើម្បីផ្តល់ឱកាសដល់កសិករមានចំណេះដឹងបច្ចេកទេសកសិកម្មដោយអាចទាញយកប្រាក់ចំណូលសម្រាប់ជីវភាពគ្រួសារប្រចាំថ្ងៃ។
លោក នាង ពិសិដ្ឋ បន្តទៀតថា ក្នុងចំណោមឃុំសំខាន់ក្នុងស្រុកបូទុមសាគរ មានតែឃុំកណ្តោល និងឃុំអណ្តូងទឹក ទេដែលមានកសិករទទួលជោគជ័យល្អតាមរយៈកិច្ចប្រឹងប្រែងបង្កបង្កើនផលរបស់ពួកគេ។
រីឯកសិករផ្សេងៗទៀតនៅមិនទាន់ប្រមូលផលល្អនៅឡើយ ដោយសារតែភាពមិនឧស្សហ៍យកចិត្តទុកដាក់លើការដំដុះ។ ប្រសិនបើប្រជាកសិករណា ផ្តោតការយកចិត្តទុកខ្ពស់ដាក់លើមុខរបរមួយនេះ គឺពួកគាត់នឹងទទួលបានផលច្រើននិងមានទីផ្សារល្អ៕ អត្តបទ៖ ឈឹម មករា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
