មនុស្សចំនួន៩នាក់ត្រូវបានចាប់ខ្លួននៅទីក្រុងឡុងដ៍្រ ចក្រភពអង់គ្លេស កាលពីថ្ងៃសៅរ៍ ២ សីហា    ខណៈបាតុកម្មប្រឆាំងជនអន្តោប្រេសន៍ និងការតវ៉ាគាំទ្រជនអន្តោប្រវេសន៍ បានកើតឡើងនៅខាងក្រៅសណ្ឋាគារ Barbican Thistle ដែលត្រូវបានប្រើជាផ្ទះសម្រាប់អ្នកស្វែងរកសិទ្ធិជ្រកកោន។

ចំនួនអ្នកត្រូវបានចាប់ខ្លួនត្រូវបានបញ្ជាក់ដោយការបង្ហោះលើប្រព័ន្ធផ្សព្វផ្សាយសង្គម X ដោយនគរបាលក្រុង ។ការបង្ហោះនោះ បានសរសេរថា ក្រុមមន្ត្រីបានចាប់ឃុំខ្លួនអ្នកតវ៉ាទាំងពីរក្រុម ដាច់ដោយឡែកពីគ្នា។ 

បាតុករប្រឆាំងជនអន្តោប្រេសន៍បានគ្រវីទង់ជាតិអង់គ្លេស ហើយស្រែកថា 'បញ្ជូនពួកគេទៅផ្ទះវិញ' ខណៈក្រុមអ្នកតវ៉ាប្រឆាំង ដែលរៀបចំដោយក្រុមមានឈ្មោះថា ក្រោកឡើងប្រឆាំងនឹងការរើសអើងពូជសាសន៍ បានកាន់បដាដែលអានថា គ្មានរដ្ឋ គ្មានព្រំដែន ជនភៀសខ្លួនត្រូវបានស្វាគមន៍នៅទីនេះ និងបញ្ឈប់ការប្រកាន់ភាពស្តាំនិយមជ្រុល។

យោងតាមរបាយការណ៍ក្នុងស្រុក បាតុកម្មប្រឆាំងជនអន្តោបប្រវេសន៍ ក៏បានកើតឡើងនៅទីក្រុង Manchester និង Newcastle ផងដែរ។

ចន្លោះពីថ្ងៃទី ៣០ខែកក្កដា ដល់ថ្ងៃទី ៧ ខែសីហា ឆ្នាំ ២០២៤ រលកនៃបាតុកម្មប្រឆាំងអន្តោប្រវេសន៍បានរីករាលដាលពាសពេញទីប្រជុំជន និងទីក្រុងចំនួន ២៧ ក្នុងចក្រភពអង់គ្លេស ដែលបណ្តាលឱ្យមានកុបកម្ម និងការវាយប្រហារប្រកាន់ពូជសាសន៍យ៉ាងហិង្សាទៅលើប្រជាជនម៉ូស្លីម និងមជ្ឈមណ្ឌលអន្តោប្រវេសន៍៕