​ភ្នំពេញ​៖ មន្ត្រី​ជាន់ខ្ពស់​របស់​ក្រសួងទេសចរណ៍​កម្ពុជា បាន​ឲ្យ​ដឹងថា លោក​នឹង​នាំមក​នូវ​ប្រព័ន្ធ​បច្ចេកវិជ្ជា​ឌីជីថល Blockchain Financial ពី​ប្រទេស​ថៃ ​ដើម្បី​យកមកប្រើ​ប្រាស់​លើ​ឧស្សាហកម្ម​ទេសចរណ៍​នៅ​កម្ពុជា ខណៈ​ប្រព័ន្ធ​ឌីជីថល​មួយ​នេះ​បាន​កំពុង​ពេញ​និយម និង​ធ្វើការ​ទាក់ទាញ​ភ្ញៀវទេសចរ​ជាតិ​អន្តរជាតិ​យ៉ាង ខ្លាំង​នៅ​ប្រទេស​ថៃ​នោះ​។​

​ថ្លែងប្រាប់​ទូរទស្សន៍​BTV តាមរយៈ​សារ​អេឡិចត្រូនិក​(​តេ​លេ​ក្រាម​) នា​រសៀល​ថ្ងៃ​ទី​១៣ ខែមករា ឆ្នាំ​២០២២​នេះ លោក បណ្ឌិត សុខ សុ​ក្រឹ​ត្យា ទីប្រឹក្សា​ផ្ទាល់​សម្តេច​តេ​ជោ ហ៊ុន សែន នាយករដ្ឋមន្ត្រី​ នៃព្រះរាជាណាចក្រ​កម្ពុជា និង​ជា​រដ្ឋលេខាធិការ​ក្រសួងទេសចរណ៍​កម្ពុជា បាន​ឲ្យ​ដឹង​ថា កាលពី​ថ្ងៃ​ទី​១២ ខែ​មករា​ម្សិលមិញ​នៅក្នុង​បេសកកម្ម​បំពេញការងារ​ផ្លូវការ​នៅ​ប្រទេស​ថៃ លោក​បាន​ជួបពិភាក្សា​ការងារ​ជាមួយ​លោក Jirayut Supsrisopha ប្រធាន​និង​ជា​អគ្គនាយក​ក្រុមហ៊ុន Bitkub Capital Group Holdings Co., LTD. (Thailand) ជា​ក្រុមហ៊ុន​ប្រើប្រាស់​ផ្នែក​បច្ចេកវិជ្ជា​ឌីជីថល Blockchain Financial មួយ​នៅ​ប្រទេស​ថៃ ដើម្បី​ស្វែងយល់​អំពី​ប្រព័ន្ធ​បច្ចេកវិជ្ជា​ទំនើប​នេះ​យកមកប្រើ​ប្រាស់​នៅ​កម្ពុជា​ដែរ​។

លោក សុខ សុ​ក្រឹ​ត្យា បាន​បន្តថា​គោលបំណង​នៃ​ការជួបពិភាក្សា​ជាមួយ​ម្ចាស់​ក្រុមហ៊ុន​នេះ​គឺ ដើម្បី​សិក្សា​ស្វែងយល់​ឲ្យ​បាន​ស៊ីជម្រៅ​ថែមទៀត​អំពី​ការប្រើប្រាស់​ប្រព័​ន្ធ​ឌីជីថល និង​ដើម្បី​សិក្សា​នាំ​យក​ប្រព័ន្ធ​ដ៏​ទំនើប​នេះ​មក​ប្រើប្រាស់ នៅក្នុង​ឧស្សាហកម្ម​ទេសចរណ៍​កម្ពុជា​នាពេល​ឆាប់ៗ​ខាងមុខនេះ ដោយ​ប្រព័ន្ធ​បច្ចេកវិជ្ជា​នេះ នឹងធ្វើ​ការទាក់ទាញ​អ្នកវិនិយោគ​លើ​វិស័យ​ទេសចរណ៍ និង​ភ្ញៀវទេសចរ​ជាតិ និង​អន្តរជាតិ​កាន់តែច្រើន​ដោយសារតែ​ប្រព័ន្ធ​នេះ​វា​បានផ្តល់​ភាពងាយស្រួល​ក្នុងការ​គ្រប់គ្រង​នោះ​។

នៅក្នុង​កិច្ច​ជំនួប​នោះ លោក​អគ្គនាយក​ក្រុមហ៊ុន បានផ្តល់​បទពិសោធន៍​រួមទាំង​ចំណេះដឹង​សំខាន់ៗ​ទាក់ទង​និង​ហេដ្ឋារចនាសម្ព័ន្ធ​ដ៏​ទំនើប​នេះ ហើយ​បានបង្ហាញ​ពី​សក្តានុពល​និង​សារៈសំខាន់​នៃ​ការប្រើប្រាស់ ប្រព័ន្ធ​ឌីជីថល​នេះ​ផង​ដែរ​។ លោក​បាន​លើកឡើងថា ក្រុមហ៊ុន Bitkub រីករាយ​និង​ត្រៀម​សហការ​ជាមួយ​រាជរដ្ឋាភិបាល​កម្ពុជា​ក៏ដូចជា​វិស័យ​ឯកជន​ដ៏ទៃ​ទៀត ក្នុង​ការ​នាំយក​ប្រព័​ន្ធ​បច្ចេកវិជ្ជា​ទំនើប​នេះ​មកប្រើប្រាស់​ក្នុងការ​អភិវឌ្ឍ​ប្រទេស ដើម្បី​ធ្វើយ៉ាងណា​ឲ្យ​កម្ពុជា​កាន់តែ​រីកចម្រើន​បន្ថែមទៀត​លើ​វិស័យ​ទេសចរណ៍ ស្រប​ពេលដែល​កម្ពុ​ជាមាន​សក្ដានុភាព​ច្រើន​លើ​វិស័យ​មួយ​នេះ​។

ជាមួយគ្នា​នោះ​លោកនាយក​ក្រុមហ៊ុន ក៏បាន​បញ្ជាក់​ផងដែរ​ថា ប្រព​ន្ធ័​បច្ចេកវិជ្ជា​ដ៏​ទាន់​សម​យ័​មួយ​នេះ​គឺ​គ្មាន​អ្នកណា​អាច​ហេ​ក​ព័ត៌មាន​សម្ងាត់​បាន​នោះ​ឡើយ ខណៈ​វា​មាន​ប្រព័ន្ធ​សន្តិសុខ​ឌីជីថល​ល្អ​ក្នុង​ការ​រក្សា​ទិន្នន័យ​របស់​អតិថិជន​នោះ​៕ អត្ថបទ​៖ បាន ចក់​

​