ទីប្រឹក្សាជាន់ខ្ពស់របស់ប្រធានាធិបតីអ៊ុយក្រែនលោក Volodymyr Zelenskyy បានជំរុញឱ្យសហរដ្ឋអាមេរិក ច្របាច់កសេដ្ឋកិច្ចរបស់ប្រទេសរុស្ស៊ីដោយការដាក់ទណ្ឌកម្មបន្ទាប់បន្សំលើដៃគូពាណិជ្ជកម្មរបស់ទីក្រុងមូស្គូ ខណៈសេតវិមានជំរុញឱ្យមានបទឈប់បាញ់។

ប្រធានាធិបតី លោក Donald Trump បាននិយាយកាលពីថ្ងៃសុក្រ ទី១ ខែសីហា ថា លោកបានបញ្ជាឱ្យនាវាមុជទឹកនុយក្លេអ៊ែរចំនួនពីរគ្រឿង ត្រូវបានផ្លាស់ទីទៅកាន់តំបន់សមស្រប ក្នុងការឆ្លើយតបទៅនឹងការគំរាមកំហែងថ្មីៗនេះពីអតីតប្រធានាធិបតីរុស្ស៊ី លោក ឌីមីទ្រី ម៉េដវេដេវ(Dmitry Medvedev) ។ លោក Trump បានបង្ហោះលើបណ្តាញផ្សព្វផ្សាយសង្គមថា «ខ្ញុំបានបញ្ជាឱ្យនាវាមុជទឹកនុយក្លេអ៊ែរចំនួនពីរគ្រឿងត្រូវបានដាក់ទីតាំងក្នុងតំបន់សមស្រប ក្នុងពេលមានសេចក្តីថ្លែងការណ៍ដ៏ល្ងង់ខ្លៅ និងបង្ករឿង» ។

លោក Andriy Yermak ប្រធានការិយាល័យរបស់លោក Zelenskyy បានសរសេរនៅលើ Telegram កាលពីថ្ងៃអាទិត្យដោយដកស្រង់ទិន្នន័យដែលលោកបាននិយាយថា បង្ហាញពីការដួលរលំនៃសមត្ថភាពផ្លូវដែករុស្ស៊ី ក្នុងរយៈពេល ១២ ខែកន្លងមកនេះ ថា ទណ្ឌកម្មកំពុងដំណើរការហើយ។

លោក Yermak បានសរសេរថាសេដ្ឋកិច្ចដែលជួយដល់សង្រ្គាម មិនអាចទប់ទល់នឹងសម្ពាធបានទេ ហើយកំពុងតែពឹងលើតាមរយៈការលក់ធនធានថាមពលប៉ុណ្ណោះ។ វាអាចទៅរួចក្នុងការច្របាច់កសេដ្ឋកិច្ចជាមួយនឹងពន្ធបន្ទាប់បន្សំដែលបានស្នើឡើងនៅក្នុងសហរដ្ឋអាមេរិក។

នៅថ្ងៃទី១៤ ខែកក្កដា លោក Trump បាននិយាយថា លោកនឹងទុកពេល៥០ ថ្ងៃសម្រាប់ប្រធានាធិបតីរុស្ស៊ី លោក Vladimir Putin ដើម្បីយល់ព្រមបទឈប់បាញ់ជាមួយអ៊ុយក្រែន បន្ទាប់មកលោកនឹងពិចារណាលើការដាក់ទណ្ឌកម្មបន្ទាប់បន្សំ និងវិធានការផ្សេងៗទៀត។

នៅថ្ងៃទី ២៩ ខែកក្កដា លោក Trump បានកាត់បន្ថយរយៈពេល មកនៅត្រឹម១០ ថ្ងៃដោយលើកឡើងពីការខកចិត្តចំពោះការបន្តការវាយប្រហារដោយយានដ្រូន និងមីស៊ីលរបស់រុស្ស៊ីលើទីក្រុងនានារបស់អ៊ុយក្រែន។ ឱសានវាទពេលនេះនឹងផុតកំណត់នៅថ្ងៃទី ៨ ខែសីហា៕