ជំនួយការជាន់ខ្ពស់របស់លោកប្រធានាធិបតីអាមេរិក Donald Trump កាលពីថ្ងៃអាទិត្យ (០៣ សីហា) បានចោទប្រកាន់ឥណ្ឌា ថាបានផ្តល់ហិរញ្ញប្បទានប្រកបដោយប្រសិទ្ធភាពដល់សង្គ្រាមរុស្ស៊ីនៅអ៊ុយក្រែន តាមរយៈការទិញប្រេងពីទីក្រុងមូស្គូ បន្ទាប់ពីថ្នាក់ដឹកនាំសហរដ្ឋអាមេរិក បានបង្កើនសម្ពាធលើទីក្រុងញូវដែលី ឱ្យបញ្ឈប់ការទិញប្រេងពីរុស្ស៊ី។

លោក Stephen Miller អនុប្រធានបុគ្គលិកនៅសេតវិមាន និងជាជំនួយការដ៏មានឥទ្ធិពលបំផុតម្នាក់របស់លោក Trump បាននិយាយថា "លោក Trump បាននិយាយយ៉ាងច្បាស់ៗថា នេះជារឿងមិនអាចទទួលយកទេដែលឥណ្ឌា បន្តផ្តល់ហិរញ្ញប្បទានដល់សង្រ្គាមនេះដោយការទិញប្រេងពីរុស្ស៊ី"។

ការរិះគន់របស់លោក Miller គឺជាការរិះគន់ខ្លាំងក្លាបំផុតមួយដោយរដ្ឋបាលលោក Trump លើគូដ៏សំខាន់មួយរបស់សហរដ្ឋអាមេរិក ក្នុងឥណ្ឌូប៉ាស៊ីហ្វិក។ ប្រភពរដ្ឋាភិបាលឥណ្ឌា បានប្រាប់សារព័ត៌មានរ៉យទ័រកាលពីថ្ងៃសៅរ៍ថា ទីក្រុងញូវដែលីនឹងបន្តការទិញប្រេងពីទីក្រុងមូស្គូ ទោះបីជាមានការគំរាមកំហែងពីសហរដ្ឋអាមេរិកក៏ដោយ។

ការដំឡើងពន្ធ ២៥% លើផលិតផលឥណ្ឌា បានប្រកាសឡើងកាលពីថ្ងៃសុក្រសប្ដាហ៍មុន ក្នុងអ្វីដែលសហរដ្ឋអាមេរិកនិយាយថាគឺជាលទ្ធផលនៃការទិញឧបករណ៍យោធា និងថាមពលពីរុស្ស៊ី។ លោក Trump ក៏បានគំរាមយកពន្ធ ១០០% លើការនាំចូលរបស់អាមេរិកពីប្រទេសទាំងឡាយណាដែលទិញប្រេងពីរុស្ស៊ី លុះត្រាតែក្រុងមូស្គូសម្រេចបានកិច្ចព្រមព្រៀងសន្តិភាពជាមួយអ៊ុយក្រែន៕