មនុស្សយ៉ាងតិច ៤នាក់ បានស្លាប់ និងជាង ៥.៩០០នាក់ ត្រូវបង្ខំចិត្តជម្លៀសខ្លួនចេញនៅភាគខាងត្បូងកោះតៃវ៉ាន់ បន្ទាប់ពីកោះនេះបានកត់ត្រាទឹកភ្លៀងធ្លាក់ច្រើនជាងមួយឆ្នាំ ក្នុងសប្តាហ៍កន្លងមក ដែលបណ្តាលឱ្យមានបំណាក់ដី និងទឹកជំនន់ដ៏រីករាលដាល។

អាជ្ញាធរនិយាយថា មនុស្ស ៣នាក់កំពុងបាត់ខ្លួន និងប្រមាណ ៧៧នាក់បានរងរបួស ចាប់តាំងពីចុងខែកក្កដាមក នៅពេលមានព្យុះភ្លៀង និងខ្យល់បក់បោកខ្លាំងនៅភាគនិរតី បានចាប់ផ្តើមបង្កឱ្យមានទឹកជំនន់ និងបំណាក់ដីនៅភាគខាងត្បូងកោះតៃវ៉ាន់ ដែលជាតំបន់សំខាន់សម្រាប់វិស័យកសិកម្មរបស់កោះនេះ។

មន្ត្រីជាន់ខ្ពស់កោះតៃវ៉ាន់លោក Cho Jung-tai នៅថ្ងៃចន្ទ (០៤ សីហា) នេះ បានចុះទៅសួរសុខទុក្ខប្រជាជននៅទីក្រុង Tainan ភាគខាងត្បូង ដែលរងការវាយប្រហារយ៉ាងធ្ងន់ធ្ងរដោយព្យុះទីហ្វុង Danas និងភ្លៀងនាពេលថ្មីៗនេះ ហើយបាននិយាយថា អាជ្ញាធរកោះកំពុងធ្វើការដើម្បីស្នើសុំថវិកាពិសេសក្នុងសប្តាហ៍នេះ ជួយដល់កិច្ចខិតខំប្រឹងប្រែងសង្គ្រោះ។

រដ្ឋាភិបាលកោះបាននិយាយថា មនុស្សជាង ២.០០០នាក់ នៅតែត្រូវបានបង្ខំឱ្យនៅឆ្ងាយពីផ្ទះសម្បែងរបស់ពួកគេ ភាគច្រើននៅក្នុងភូមិភ្នំភាគខាងត្បូងនៃស្រុក Kaohsiung និង Pingtung ជាទីដែលក្រុមអ្នកជួយសង្គ្រោះកំពុងធ្វើការស្តារផ្លូវថ្នល់ឡើងវិញ ដែលកាត់ផ្តាច់ដោយបំណាក់ដី ឬការជន់លិច និងផ្តល់ស្បៀងអាហារ និងការផ្គត់ផ្គង់ផ្នែកវេជ្ជសាស្រ្តដល់អ្នករងផលប៉ះពាល់៕