លោកឧត្តមសេនីយ៍ទោ Amir Hatami បាននិយាយថា ការគំរាមកំហែងនៃការវាយប្រហាររបស់អ៊ីស្រាអែលលើអ៊ីរ៉ង់ នៅតែបន្តកើតមាន ហើយជម្លោះមិនអាចត្រូវបានគេចាត់ទុកថា បញ្ចប់ទាំងស្រុងនោះទេ។

លោក Hatami បាននិយាយថា៖«ការគំរាមកំហែង ១% ត្រូវតែត្រូវបានយល់ថា ជាការគំរាមកំហែង ១០០% ។ យើងមិនគួរមើលស្រាលសត្រូវឡើយ ហើយចាត់ទុកការគំរាមកំហែងរបស់ពួកគេថា មានកម្រិតខ្ពស់ណាស់។ នេះបើយោងតាមទីភ្នាក់ងារសារព័ត៌មានផ្លូវការ IRNA។

លោកបានបន្ថែមថា កម្លាំងមីស៊ីល និងយានដ្រូនរបស់សាធារណរដ្ឋឥស្លាម «នៅតែបន្តត្រៀមខ្លួនសម្រាប់ប្រតិបត្តិការ»។

នៅយប់ថ្ងៃទី ១៣ ខែមិថុនា អ៊ីស្រាអែល បានចាប់ផ្តើមប្រតិបត្តិការតោងើប (Rising Lion) ប្រឆាំងនឹងកម្មវិធីនុយក្លេអ៊ែររបស់អ៊ីរ៉ង់។ រយៈពេលតិចជាង ២៤ម៉ោងក្រោយមក អ៊ីរ៉ង់បានបើកការវាយប្រហារសងសឹក។ រយៈពេលប៉ុន្មានថ្ងៃក្រោយមក ទីក្រុងតែលអាវីវ (Tel Aviv) និងទីក្រុងតេអេរ៉ង់ (Tehran) បានវាយប្រហារគ្នាទៅវិញទៅមក។

នៅព្រឹកថ្ងៃទី ២២ ខែមិថុនា លោកប្រធានាធិបតី ដូណាល់ ត្រាំ ( Donald Trump) បានប្រកាសថា សហរដ្ឋអាមេរិក បានវាយប្រហារដោយជោគជ័យនូវទីតាំងនុយក្លេអ៊ែរអ៊ីរ៉ង់ចំនួនបី គឺនៅក្នុងទីក្រុង Fordow, Natanz និង Isfahan។