មហាសេដ្ឋីអចលនទ្រព្យសិង្ហបុរី លោក Ong Beng Seng បានផ្ដល់ចម្លើយពីភាពមានទោស ចំពោះបទចោទប្រកាន់រារាំងយុត្តិធម៌ នៅថ្ងៃចន្ទ (០៤ សីហា) នេះ ក្នុងសំណុំរឿងពុករលួយដ៏កក្រើក ដែលនាំទៅដល់ការកាត់ទោសជាប់ពន្ធនាគារលើអតីតរដ្ឋមន្ត្រីដឹកជញ្ជូន លោក S. Iswaran កាលឆ្នាំមុន។

យ៉ាងណាមិញ ទាំងតំណាងអយ្យការ និងមេធាវីការពារក្តី បានយល់ព្រមសម្រាលទោសដល់លោក Ong ដែលមានជំងឺរ៉ាំរ៉ៃ ហើយបានស្នើឱ្យលោកទទួលរងការផាកពិន័យជំនួសឱ្យការជាប់ពន្ធនាគារ ខណៈលោកនឹងត្រូវកាត់ទោសផ្លូវការនៅថ្ងៃទី១៥ ខែសីហា ខាងមុខ។ ការចោទប្រកាន់ទីពីរទៅលើការជួយប្រព្រឹត្តបទល្មើស ក៏ត្រូវបានយកមកពិចារណាផងដែរ។

លោក Ong មានឈ្មោះនៅក្នុងបទចោទជាច្រើនករណី ដែលអតីតរដ្ឋមន្ត្រីដឹកជញ្ជូនរបស់សិង្ហបុរី លោក Iswaran ត្រូវបានរកឃើញថាមានទោស។ លោក Iswaran ត្រូវកាត់ទោសឱ្យជាប់ពន្ធនាគារ ១២ខែកាលពីខែមេសាឆ្នាំមុន ពីបទរារាំងយុត្តិធម៌ និងការទទួលបានអំណោយជាង ៣០០.០០០ដុល្លារ នៅក្នុងការជាប់ពន្ធនាគារលើកដំបូងរបស់អតីតសមាជិកគណៈរដ្ឋមន្ត្រីនៅក្នុងប្រទេសសិង្ហបុរី ដែលល្បីល្បាញសម្រាប់អភិបាលកិច្ចស្អាតស្អំ។

សំណុំរឿងនេះបានធ្វើឱ្យកក្រើកប្រទេស ដែលមានមោទនភាពចំពោះការិយាធិបតេយ្យប្រាក់ខែសមរម្យ និងប្រកបដោយប្រសិទ្ធភាព ព្រមទាំងអភិបាលកិច្ចដ៏រឹងមាំរបស់ខ្លួន។ សិង្ហបុរីស្ថិតក្នុងចំណោមប្រទេសដែលមានអំពើពុករលួយតិចបំផុតទាំង៥ របស់ពិភពលោកកាលពីឆ្នាំ២០២៣ នេះបើយោងតាមសន្ទស្សន៍ការយល់ឃើញពីអំពើពុករលួយរបស់អង្គការតម្លាភាពអន្តរជាតិ៕