អាជ្ញាធរគ្រោះមហន្តរាយ កាលពីថ្ងៃអាទិត្យ (ទី៣ ខែសីហា) បានប្រាប់ឲ្យដឹងថា ចំនួនអ្នកស្លាប់ដោយសារទឹកជំនន់ នៅតំបន់ភាគខាងជើងនៃប្រទេសវៀតណាម បានកើនឡើងដល់ចំនួន ១០នាក់ហើយ។

ភ្លៀងធ្លាក់ខ្លាំង បានបង្កជាទឹកជំនន់ក្នុងប៉ុន្មានថ្ងៃថ្មីៗនេះ នៅក្នុងខេត្ត Son La, Phu Tho, Tuyen Quang និងជាពិសេស ខេត្ត Dien Bien ដែលនៅដាច់ឆ្ងាយពីសហគមន៍ជាច្រើន។ ក្រសួងកសិកម្ម បានបញ្ជាក់ថា មនុស្សយ៉ាងហោចណាស់ ១០នាក់ បានបាត់បង់ជីវិត ហើយ ៧នាក់ផ្សេងទៀត រងរបួស នៅក្នុងឃុំ Tia Dinh និង Xa Dung របស់ខេត្ត Dien Bien។

ប្រព័ន្ធផ្សព្វផ្សាយរដ្ឋ បានដកស្រង់សម្តីអាជ្ញាធរក្នុងតំបន់ ដែលបាននិយាយថា ភ្លៀងធ្លាក់ខ្លាំង ចាប់ពីថ្ងៃព្រហស្បតិ៍ រហូតដល់ថ្ងៃសៅរ៍សប្ដាហ៍កន្លងមក បង្កឲ្យមានទឹកជំនន់យ៉ាងគំហុកភ្លាមៗ។ កាលពីថ្ងៃសៅរ៍ អាជ្ញាធរមូលដ្ឋាន បានដាក់ពង្រាយឧទ្ធម្ភាគចក្រ ដើម្បីចូលទៅកាន់សហគមន៍នៅដាច់ឆ្ងាយពីគេ និងផ្តល់នូវសម្ភារផ្គត់ផ្គង់ចាំបាច់សំខាន់ៗ។

កាលពីល្ងាចថ្ងៃអាទិត្យ អ្នកស្រុកត្រូវបាននាំទៅកាន់តំបន់សុវត្ថិភាព ខណៈសេវាអគ្គិសនី និងទូរគមនាគមន៍ភាគច្រើន ត្រូវបានស្ដារឡើងវិញ។ កាលពីចុងខែកក្កដា គ្រោះទឹកជំនន់ស្រដៀងគ្នានេះ បានបណ្ដាលឲ្យមនុស្ស ៥នាក់ស្លាប់ ក្នុងខេត្ត Son La ដោយបានជន់លិចដំណាំ ហើយហូរនាំយកគោក្របី និងសត្វចិញ្ចឹមផ្សេងទៀត។ ប្រទេសវៀតណាម ឥឡូវនេះ កំពុងស្ថិតក្នុងរដូវព្យុះត្រូពិក ដែលជារឿយៗបណ្តាលឲ្យមានទឹកជំនន់ និងបំណាក់ដីដ៏អាក្រក់៕