សេវាសន្តិសុខរបស់ប្រទេសអ៊ុយក្រែន (SBU) បានឲ្យដឹងថា អង្គភាពកងកម្លាំងពិសេស «A» របស់ SBU បានបើកការវាយប្រហារដោយជោគជ័យលើមូលដ្ឋានអាកាសយោធារុស្ស៊ីដ៏សំខាន់មួយ នៅក្នុងតំបន់កាន់កាប់គ្រីម៉ា។

នៅព្រឹកថ្ងៃចន្ទ (ទី៤ ខែសីហា) នេះ យានដ្រូនដែលដំណើរការដោយអង្គភាពវរជន «A» របស់ SBU បានវាយប្រហារមូលដ្ឋានអាកាស Saky ជាមជ្ឈមណ្ឌលអាកាសចរណ៍ដ៏សំខាន់បំផុតមួយរបស់រុស្ស៊ីដែលគាំទ្រប្រតិបត្តិការ នៅក្នុងសមុទ្រខ្មៅ។ ការវាយប្រហារនេះបានបំផ្លាញឃ្លាំងអាវុធមួយ និងយន្តហោះយោធាចំនួន ៥គ្រឿង។

ទីភ្នាក់ងារនេះ បានប្រាប់ឲ្យដឹងបន្ថែមថា យន្តហោះចម្បាំង Su-30SM ១គ្រឿង ត្រូវបានបំផ្លាញ ហើយប្រភេទដូចគ្នា ១គ្រឿងទៀតត្រូវរងខូចខាត។ លើសពីនេះ យន្តហោះទម្លាក់គ្រាប់បែក Su-24 ៣គ្រឿង ត្រូវបានវាយប្រហារ។ 

ទីភ្នាក់ងារនេះ បានបន្ថែមថា ប្រតិបត្តិការពិសេសរបស់ SBU នេះ គឺជាជំហានមួយទៀត ក្នុងការធ្វើឲ្យចុះខ្សោយដល់កងកម្លាំងទ័ពអាកាស និងកងកម្លាំងរបស់រុស្ស៊ីនៅតំបន់កាន់កាប់ទាំងមូល។

យ៉ាងណាក្ដី សារព័ត៌មាន Reuters មិនអាចផ្ទៀងផ្ទាត់បានដោយឯករាជ្យឡើយ ពាក់ព័ន្ធនឹងរបាយការណ៍នេះ៕