ក្រុមអាជ្ញាធរសុខាភិបាលក្នុងតំបន់ហ្កាហ្សាបាននិយាយថា យ៉ាងហោចណាស់ជនជាតិប៉ាឡេស្ទីន ៤០នាក់ត្រូវបានសម្លាប់ដោយសារការបាញ់ប្រហារ និងការវាយប្រហារតាមអាកាសរបស់អ៊ីស្រាអែលនៅហ្កាហ្សាកាលពីថ្ងៃចន្ទ ៤ សីហា រួមទាំង១០នាក់បានស្លាប់ពេលកំពុងស្វែងរកជំនួយមនុស្សធម៌។

មនុស្ស៥នាក់ផ្សេងទៀតត្រូវបានគេរាយការណ៍ថាបានស្លាប់ដោយសារការអត់ឃ្លាន ខណៈភាពអត់ឃ្លាន និងភាពវឹកវរ កើតឡើងពាសពេញដែនដីនេះ ខណៈនាយករដ្ឋមន្ត្រីអ៊ីស្រាអែលកំពុងពង្រីកការវាយលុក ។        

ក្រុមគ្រូពេទ្យក្នុងតំបន់បាននិយាយថា អ្នកស្វែងរកជំនួយទាំង ១០ នាក់ត្រូវបានសម្លាប់នៅក្នុងឧបទ្ទវ ហេតុពីរដាច់ដោយឡែកពីគ្នានៅជិតកន្លែងចែកចាយជំនួយដែលដំណើរការដោយមូលនិធិមនុស្សធម៌ ហ្កាហ្សា(GHF)គាំទ្រដោយសហរដ្ឋអាមេរិក ។

យោងតាមអង្គការសហប្រជាជាតិ  មនុស្សជាង១.០០០នាក់ ត្រូវបានសម្លាប់ក្នុងពេលព្យាយាម ទទួលបានជំនួយពីមូលនិធិមនុស្សធម៌ហ្កាហ្សា ចាប់តាំងពីក្រុមនេះបានចាប់ផ្តើមប្រតិបត្តិការនៅក្នុងខែឧសភា ។

ការស្លាប់ភាគច្រើនត្រូវបានគេរាយការណ៍ថាបណ្តាលមកពីកងកម្លាំងអ៊ីស្រាអែលបានបាញ់នៅក្បែរទីតាំងនានា។ទោះជាយ៉ាងណាក៏ដោយ មូលនិធិមនុស្សធម៌ហ្កាហ្សា បាននិយាយថាមិនមានឧបទ្ទវហេតុនៅឬនៅជិតទីតាំងរបស់ពួកគេទេកាលពីថ្ងៃចន្ទ។ សារព័ត៌មាន Reuters មិនអាចផ្ទៀងផ្ទាត់ទីតាំងនៃឧបទ្ទវហេតុទាំងនោះបានទេ។    

កាលពីថ្ងៃអាទិត្យ មន្ត្រីសុខាភិបាលតំបន់ហ្កាហ្សាបាននិយាយថា យ៉ាងហោចណាស់មានជនជាតិប៉ាឡេស្ទីន ១៣ នាក់ត្រូវបានសម្លាប់នៅឯច្រកឆ្លងកាត់ព្រំដែន Zikim ខណៈកំពុងរង់ចាំរថយន្តជំនួយរបស់អង្គការសហប្រជាជាតិ នៅជិតព្រំដែនភាគខាងជើងជាមួយប្រទេសអ៊ីស្រាអែល៕