អតីតប្រធានាធិបតីរុស្ស៊ី លោក Dmitry Medvedev កាលពីថ្ងៃចន្ទ (០៤ សីហា) បានស្តីបន្ទោសបណ្ដាប្រទេសណាតូ ចំពោះជំហានរបស់រុស្ស៊ី ក្នុងការបោះបង់ចោលនូវកិច្ចព្រមព្រៀងផ្អាកដាក់ពង្រាយមីស៊ីលនុយក្លេអ៊ែររយៈចម្ងាយខ្លី និងមធ្យម ហើយនិយាយថា ទីក្រុងមូស្គូនឹងចាត់វិធានការបន្ថែមទៀតក្នុងការឆ្លើយតបលើរឿងនេះ។

លោក Medvedev — ដែលបានផ្ទុះសង្រ្គាមពាក្យសម្ដីតាមប្រព័ន្ធផ្សព្វផ្សាយសង្គមជាមួយលោកប្រធានាធិបតីអាមេរិក Donald Trump — បានធ្វើការអត្ថាធិប្បាយបែបនេះ បន្ទាប់ពីក្រសួងការបរទេសរុស្ស៊ីនិយាយថា ទីក្រុងមូស្គូលែងចាត់ទុកថាខ្លួនជាប់ចំណងផ្លូវច្បាប់ក្នុងកិច្ចព្រមព្រៀងផ្អាកនេះទៀតហើយ ស្តីពីការដាក់ពង្រាយមីស៊ីលនុយក្លេអ៊ែររយៈចម្ងាយខ្លី និងមធ្យម។

លោក Medvedev បានសរសេរបង្ហោះលើបណ្ដាញសង្គម X ថា "សេចក្តីថ្លែងការណ៍របស់ក្រសួងការបរទេសរុស្ស៊ីស្តីពីការដកខ្លួនពីកិច្ចព្រមព្រៀងផ្អាកដាក់ពង្រាយមីស៊ីលរយៈចម្ងាយមធ្យម និងខ្លី គឺជាលទ្ធផលនៃគោលនយោបាយប្រឆាំងរុស្ស៊ី របស់ប្រទេសណាតូ"។ លោកបន្ថែមថា៖ "នេះគឺជាការពិតថ្មីមួយដែលគូប្រជែងរបស់រុស្ស៊ីទាំងអស់នឹងត្រូវគិតគូរ ហើយរំពឹងថានឹងមានជំហានបន្ថែមទៀត"។

លោក Medvedev ដែលបច្ចុប្បន្នកាន់តំណែងជាអនុប្រធានក្រុមប្រឹក្សាសន្តិសុខដ៏មានឥទ្ធិពលរបស់រុស្ស៊ី មិនបានបញ្ជាក់លម្អិតទេថាជំហានបន្ថែមនោះជាអ្វីខ្លះ។ គួរឱ្យដឹងថា សហរដ្ឋអាមេរិក បានដកខ្លួនចេញពីសន្ធិសញ្ញាកម្លាំងនុយក្លេអ៊ែររយៈចម្ងាយមធ្យម ក្នុងឆ្នាំ២០១៩ ដោយលើកឡើងពីការមិនគោរពតាមពីភាគីរុស្ស៊ី។ រុស្ស៊ីបាននិយាយតាំងពីពេលនោះមកថា ខ្លួននឹងមិនដាក់ពង្រាយសព្វាវុធបែបនេះទេ ប្រសិនបើទីក្រុងវ៉ាស៊ីនតោន មិនធ្វើដូច្នេះ៕