មន្ត្រីរដ្ឋបាលអាមេរិកមួយរូបបានប្រាប់សារព័ត៌មានរ៉យទ័រថា ប្រធានាធិបតីសហរដ្ឋអាមេរិក លោក Donald Trump នឹងចុះហត្ថលេខាលើក្រឹត្យមួយនៅថ្ងៃអង្គារ (០៥ សីហា) នេះ ដើម្បីបង្កើតក្រុមការងារកីឡាអូឡាំពិកនៅសេតវិមាន ដើម្បីដោះស្រាយរឿងសន្តិសុខ និងបញ្ហាផ្សេងទៀត ទាក់ទងនឹងការប្រកួតកីឡាអូឡាំពិករដូវក្តៅឆ្នាំ២០២៨ នាពេលខាងមុខ។

មន្ត្រីរូបនោះបាននិយាយថា ក្រុមការងារដែលបង្កើតឡើងដោយសមាជិកមកពីគណៈរដ្ឋមន្ត្រី និងទីភ្នាក់ងាររដ្ឋាភិបាលរបស់លោក Trump នេះ នឹងសម្របសម្រួលការងារសហព័ន្ធ រដ្ឋ និងរដ្ឋាភិបាលមូលដ្ឋាន លើការងារដឹកជញ្ជូន។ មន្រ្តីដដែលបន្តថា ក្រុមការងារនេះក៏នឹង "សម្រួលដំណើរការទិដ្ឋាការ និងការបញ្ជាក់អត្តសញ្ញាណសម្រាប់អត្តពលិកបរទេស គ្រូបង្វឹក មន្ត្រី និងប្រព័ន្ធផ្សព្វផ្សាយ" ផងដែរ។

គួរឱ្យដឹងថា សហរដ្ឋអាមេរិក នឹងធ្វើជាម្ចាស់ផ្ទះកីឡាអូឡាំពិកនៅទីក្រុង Los Angeles ក្នុងរយៈពេល ៣ឆ្នាំខាងមុខនេះ។ លោក Trump មកពីបក្សសាធារណរដ្ឋដែលបានចាញ់ឆ្នោតឆ្នាំ២០២០ ទល់នឹងអ្នកប្រជាធិបតេយ្យ លោក Joe Biden បានសម្តែងក្ដីរីករាយខ្លាំងណាស់ដែលថាអាណត្តិទីពីររបស់លោកស្របគ្នាជាមួយនឹងព្រឹត្តិការណ៍អូឡាំពិកឆ្នាំ២០២៨ និងការប្រកួតបាល់ទាត់ពិភពលោក World Cup។

អ្នកនាំពាក្យសេតវិមាន លោកស្រី Karoline Leavitt បាននិយាយក្នុងសេចក្តីថ្លែងការណ៍មួយនៅថ្ងៃចន្ទថា៖ ក្នុងអំឡុងពេលអាណត្តិដំបូង លោកប្រធានាធិបតី Trump ចាត់ទុកការធ្វើជាម្ចាស់ផ្ទះរបស់អាមេរិក នៃកីឡាអូឡាំពិករដូវក្តៅឆ្នាំ២០២៨ នៅទីក្រុង Los Angeles ជារឿងដ៏មានសារសំខាន់ ហើយក្នុងអាណត្តិទីពីរ លោកប្រធានាធិបតី Trump បានចាត់ទុករឿងនេះថាជាកិត្តិយសដ៏អស្ចារ្យបំផុតក្នុងការទទួលបន្ទុកទស្សនីយភាពកីឡាពិភពលោក"៕