ប្រព័ន្ធផ្សព្វផ្សាយរដ្ឋបាននិយាយថា ក្រុមអាជ្ញាធរចិនបានជម្លៀសមនុស្សជាង៨២.០០០នាក់ នៅទូទាំងទីក្រុងប៉េកាំង ដែលមានហានិភ័យពីភ្លៀងធ្លាក់ខ្លាំង បន្ទាប់ពីមនុស្សរាប់សិបនាក់បានស្លាប់ក្នុងទឹកជំនន់នៅជាយរដ្ឋធានីនេះ កាលពីសប្តាហ៍មុន។ 

ទីភ្នាក់ងារសារព័ត៌មានរដ្ឋ Xinhua បាននិយាយថា មនុស្សរាប់ម៉ឺននាក់ត្រូវបានជម្លៀសចេញពីតំបន់ងាយរងគ្រោះ គិតត្រឹមម៉ោង ៩ យប់ថ្ងៃចន្ទ ៤ សីហា នេះបើយោងតាមទីស្នាក់ការកណ្តាលគ្រប់គ្រងទឹកជំនន់របស់រដ្ឋធានី។   

ក្រុមអាជ្ញាធរបានព្រមានពីហានិភ័យនៃទឹកជំនន់នៅក្នុងស្រុក Miyun ភាគពាយ័ព្យ ដែលជាតំបន់រងគ្រោះខ្លាំងបំផុតដោយទឹកជំនន់កាលពីសប្តាហ៍មុន ក៏ដូចជា ស្រុកFangshan ភាគនិរតី ស្រុក Mentougou ភាគខាងលិច និងស្រុក Huairou ភាគខាងជើងរដ្ឋធានីប៉េកាំង។

សេវាអាកាសធាតុក្រុងក៏បានប្រកាសការជូនដំណឹងពណ៌ក្រហម ដែលជាប្រព័ន្ធខ្ពស់បំផុតក្នុងប្រព័ន្ធបួនកម្រិតផងដែរ ដែលព្យាករណ៍ថានឹងមានភ្លៀងធ្លាក់ខ្លាំងចាប់ពីថ្ងៃត្រង់ថ្ងៃចន្ទដល់ព្រឹកថ្ងៃអង្គារសប្ដាហ៍នេះ។

យោងតាមតួលេខផ្លូវការបានឱ្យដឹងថា ទឹកជំនន់នៅតំបន់ភាគខាងជើងជាយរដ្ឋធានីប៉េកាំងបានសម្លាប់មនុស្សយ៉ាងហោចណាស់ ៤៤ នាក់ និងបានធ្វើឱ្យមនុស្ស៩នាក់បាត់ខ្លួនកាលពីសប្តាហ៍មុន៕