នៅក្នុងជំហានដ៏សំខាន់បំផុតមួយសម្រាប់ឧស្សាហកម្មការពារជាតិរបស់ប្រទេសជប៉ុន អូស្ត្រាលីបានប្រកាសនៅថ្ងៃអង្គារ (០៥ សីហា) នេះថា ខ្លួននឹងទិញនាវាចម្បាំងទំនើបៗរបស់ជប៉ុនចំនួន ១១គ្រឿង នៅក្នុងអ្វីដែលនឹងក្លាយជាកិច្ចសន្យាការពារជាតិដ៏ធំបំផុតមិនធ្លាប់មានរបស់ទីក្រុងតូក្យូ និងជាជំហានដ៏សំខាន់បំផុតសម្រាប់ទំនាក់ទំនងទ្វេភាគី។

រដ្ឋមន្ត្រីការពារជាតិអូស្ត្រាលី លោក Richard Marles បាននិយាយថា កំណែចុងក្រោយបំផុតនៃនាវាចម្បាំងប្រភេទ Mogami-class ដែលស្នើឡើងដោយឧស្សាហកម្មធុនធ្ងន់របស់ Mitsubishi ហៅកាត់ថា MHI ត្រូវបានវាយតម្លៃថា "ល្អបំផុត ដែលអាចបំពេញតម្រូវការសមត្ថភាពឆាប់រហ័ស និងតម្រូវការយុទ្ធសាស្ត្ររបស់កងកម្លាំងការពារអូស្ត្រាលី” បន្ទាប់ពីដំណើរការដេញថ្លៃយ៉ាងហ្មត់ចត់ និងប្រកួតប្រជែង សម្រាប់គម្រោង ១០ពាន់លានដុល្លារអូស្ត្រាលី (ពោលគឺប្រមាណ ៦,៤៨ពាន់លានដុល្លារអាមេរិក)។

លោក Marles បានប្រាប់អ្នកយកព័ត៌មានថា "នាវាចម្បាំងប្រភេទ Mogami នេះគឺជានាវាចម្បាំងដ៏ល្អបំផុតសម្រាប់អូស្ត្រាលី"។ លោក Marles បន្តថា ក្ដីបារម្ភរួមគ្នារបស់អូស្ត្រាលី និងជប៉ុន លើសាច់ដុំផ្នែកយោធាដែលកើនឡើងមិនឈប់របស់ចិន "ពុំមានឥទ្ធិពល" លើការសម្រេចចិត្តនេះទេ ប៉ុន្តែក្រុមអ្នកសង្កេតការណ៍បាននិយាយជាយូរមកហើយថា កង្វល់ទាំងនេះបានដើរតួយ៉ាងសំខាន់លើរឿងនេះ។

ឥឡូវនេះ អូស្ត្រាលីនឹងបន្តឆ្ពោះទៅដំណាក់កាលបន្ទាប់នៃដំណើរការលទ្ធកម្ម ដោយសារទីក្រុងកង់បេរ៉ា មានបំណងបង្កើតចំណងផ្លូវច្បាប់ និងកិច្ចសន្យាពាណិជ្ជកម្មជាមួយក្រុមហ៊ុន MHI និងរដ្ឋាភិបាលជប៉ុន នៅឆ្នាំ២០២៦។ នៅក្រោមគម្រោងនេះ ទីក្រុងកង់បេរ៉ាកំពុងស្វះស្វែងរកនាវាចម្បាំងដែលត្រូវបានកែលម្អសម្រាប់សង្គ្រាមក្រោមសមុទ្រ ដើម្បីជំនួសនាវាចម្បាំងប្រភេទ Anzac របស់ខ្លួន៕