ប្រជាជននិងអង្គការសង្គមស៊ីវិលរាប់រយនាក់ ដូចជា Greenpeace បានអំពាវនាវឱ្យមាន «សន្ធិសញ្ញាដ៏រឹងមាំ» ដើម្បី «កាត់បន្ថយការផលិតប្លាស្ទិក» កាលពីថ្ងៃចន្ទ ទី៤ ខែសីហា មួយថ្ងៃមុនពេលគណៈកម្មាធិការចរចាអន្តររដ្ឋាភិបាលសម្រាប់សន្និសីទសន្ធិសញ្ញាប្លាស្ទីកសកលចាប់ផ្តើមនៅទីក្រុងហ្សឺណែវ ប្រទេសស្វីស។

គណៈប្រតិភូ នឹងចាប់ផ្តើមកិច្ចប្រជុំនៅអង្គការសហប្រជាជាតិក្នុងទីក្រុងហ្សឺណែវនៅថ្ងៃអង្គារ ទី៥ ខែសីហានេះ ខណៈកិច្ចពិភាក្សាបន្តស្តីពីសន្ធិសញ្ញាសកលដើម្បីទប់ស្កាត់ការបំពុលដោយប្លាស្ទិក ទោះបីជាមានការព្រួយបារម្ភថាកិច្ចព្រមព្រៀងណាមួយនឹងមិនមានភាពរឹងមាំគ្រប់គ្រាន់ក៏ដោយ។

ក្រុមអ្នកតវ៉ាបានស្លៀកពាក់ពណ៌លឿង ក្រហម និងពណ៌ទឹកក្រូច ដើម្បីបង្ហាញពីភាពបន្ទាន់នៃវិបត្តិ និងគ្រោះថ្នាក់បង្កឡើងដោយការផលិតផ្លាស្ទិកដែលមិនបានត្រួតពិនិត្យ ភាគច្រើនចេញមកពីឥន្ធនៈហ្វូស៊ីល។

អ្នកវិទ្យាសាស្ត្រជាច្រើននាក់ដែលចូលរួមកិច្ចពិភាក្សាបាននិយាយថា ការកាត់បន្ថយទាំងបរិមាណប្លាស្ទិកដែលត្រូវបានផលិតនិងការដាក់រាយប៉ាយទៅក្នុងបរិស្ថាន គឺមានសារៈសំខាន់ចំពោះសុខភាពសាធារណៈ ខណៈការភាយសារធាតុគីមីប្លាស្ទិក បានផ្សារភ្ជាប់ទៅនឹងផលប៉ះពាល់អវិជ្ជមានដល់សុខភាព។

កិច្ចប្រជុំនៅទីក្រុងហ្សឺណែវ ធ្វើបន្តពីគណៈកម្មាធិការចរចាអន្តររដ្ឋាភិបាលនៅក្នុងប្រទេសកូរ៉េខាងត្បូង ដែលបានបញ្ចប់កាលពីចុងឆ្នាំមុនដោយគ្មានវិធីឈានឆ្ពោះទៅមុខលើការទប់ស្កាត់ការបំពុលដោយប្លាស្ទិក។

បញ្ហាដែលខ្វែងគំនិតគ្នាបំផុតរួមមានការផលិតគម្របវេចខ្ចប់ ការគ្រប់គ្រងផលិតផលប្លាស្ទិក និងសារធាតុគីមីដែលគួរឱ្យព្រួយបារម្ភ និងការផ្តល់ហិរញ្ញប្បទានដើម្បីជួយប្រទេសកំពុងអភិវឌ្ឍន៍ឱ្យអនុវត្តសន្ធិសញ្ញា។