ប៉ូឡូញ៖ នៅក្នុងជុំទី៣ នៃជំនួបការទូតនៅសប្ដាហ៍នេះ ដើម្បីបន្ធូរបន្ថយភាពតានតឹងជុំវិញការទាមទាររបស់ប្រទេសរុស្ស៊ី មិនឲ្យអ៊ុយក្រែនមានឱកាសចូលជាសមាជិកអង្គការ NATO រដ្ឋមន្ត្រីការបរទេសប៉ូឡូញបានព្រមានថា តំបន់អឺរ៉ុបខិតចូលកាន់តែជិតទៅរកសង្គ្រាមក្នុងរយៈពេល ៣០ឆ្នាំមកនេះ។
ថ្លែងពីក្រុមប្រេសិតពិសេសពីបណ្ដាសមាជិកនៃអង្គការសន្តិសុខ និងកិច្ចសហប្រតិបត្តិការក្នុងតំបន់អឺរ៉ុប (OSCE) លោក Zbigniew Rau ពុំបានបញ្ចេញឈ្មោះប្រទេសរុស្ស៊ីនោះទេ ប៉ុន្តែបានរាយបញ្ជីជម្លោះជាច្រើន ដោយមានទាំងការចោទប្រកាន់លើទីក្រុងម៉ូស្គូពីបទជាប់ពាក់ព័ន្ធក្នុងជម្លោះនោះផងដែរ។ លោក Rau បាននិយាយនៅក្នុងសុន្ទរកថាមួយដែលកំពុងបង្ហាញពីចំនុចអាទិភាពជាច្រើន នៃប្រទេសរបស់លោកក្នុងនាមជាប្រធានប្ដូរវេននៃអង្គការសន្តិសុខ និងកិច្ចសហប្រតិបត្តិការក្នុងតំបន់អឺរ៉ុបឆ្នាំនេះថា ការប្រឈមដែលឈានទៅរកការផ្ទុះសង្គ្រាមនៅក្នុងតំបន់នេះ នៅពេលនេះទំនងជានឹងកាន់តែជិតជាងមុនក្នុងរយៈពេល ៣០ឆ្នាំចុងក្រោយនេះ។
លោកថា រយៈពេលជាច្រើនសប្ដាហ៍មកនេះ យើងបានប្រឈមកាន់តែខ្លាំងទៅនឹងភាពតានតឹងខាងយោធានៅក្នុងតំបន់អឺរ៉ុបខាងកើត។ ប៉ូឡួញគឺជាប្រទេសមួយស្ថិតក្នុងចំណោមសមាជិក NATO ដែលមានភាពស្រពិចស្រពិលបំផុតក្នុងការប្រឈមទៅនឹងអ្វីដែលខ្លួនមើលឃើញថា រុស្ស៊ីមានមហិច្ចតាចង់ក្លាយជាអ្នកកែប្រែជោគវាសនានៅអឺរ៉ុបខាងកើត។ ប្រទេសរុស្ស៊ីបានហៅការចរចាសន្តិសុខរបស់ខ្លួនជាមួយសហរដ្ឋអាមេរិក និងអង្គការ NATO នៅសប្ដាហ៍នេះថា បរាជ័យ ដោយនិយាយថាពុំមានការខ្វែងគំនិតគ្នាបន្តលើបញ្ហាជាមូលដ្ឋាននោះទេ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
