ទីផ្សារភាគហ៊ុន បានហក់ឡើងនៅថ្ងៃអង្គារ (ទី៥ ខែសីហា) នេះ ខណៈដែលវិនិយោគិនមានទំនុកចិត្តកាន់តែខ្លាំងឡើងៗ ដែលថា ធនាគារកណ្តាល (Fed) នឹងកាត់បន្ថយអត្រាការប្រាក់នៅខែក្រោយ បើទោះបីជាមានក្ដីបារម្ភ អំពីសេដ្ឋកិច្ចរបស់សហរដ្ឋអាមេរិក និងវិធានការពន្ធគយរបស់លោក Donald Trump ក៏ដោយ។

ការកើនឡើងនេះបានកើតមានតាមភាពល្អប្រសើរនៅទីផ្សារ Wall Street ជាកន្លែងដែលពាណិជ្ជករ បានចាប់ផ្ដើមមានទំនុកចិត្តរបស់ពួកគេឡើងវិញ ក្រោយភាគហ៊ុនដាំក្បាលចុះកាលពីថ្ងៃសុក្រចុងសប្ដាហ៍កន្លងមក ដែលត្រូវបានជំរុញដោយរបាយការណ៍ អំពីការងារអាមេរិកទាបជាងការរំពឹង នៅក្នុងខែកក្កដា ខណៈដែលតួលេខកាលពី ២ខែមុន ត្រូវបានកែសម្រួលក្នុងកម្រិតធ្លាក់ចុះយ៉ាងខ្លាំង។

បើយោងតាមសារព័ត៌មាន Bloomberg បានឲ្យដឹងថា របាយការណ៍នោះបានធ្វើឲ្យមានក្ដីបារម្ភថា សេដ្ឋកិច្ចដ៏ធំបំផុតជាងគេរបស់ពិភពលោកកំពុងស្ថិតក្នុងស្ថានភាពអាក្រក់ជាងការរំពឹងទុក បើទោះបីជាវាក៏គាំទ្រដល់ឱកាសដែល Fed នឹងកាត់បន្ថយអាត្រាការប្រាក់នៅក្នុងខែកញ្ញាក៏ដោយ។ ទីផ្សារកំណត់ឱកាសប្រហែល ៩៥ភាគរយ ដែលអាត្រាការប្រាក់អាចនឹងត្រូវបានកាត់បន្ថយ ០,២៥ភាគរយ។

ជាមួយគ្នានេះ ក៏មានការលើកឡើងផងដែរថា មន្ត្រីធនាគារអាចកាត់បន្ថយនៃកម្រិតខាងលើទ្វេដង ពោលគឺ ០,៥០ភាគរយ។ លោក Stephen Innes នៅក្រុមហ៊ុន SPI Asset Management បាននិយាយថា៖ «បរិយាកាសបានផ្លាស់ប្តូរលឿនណាស់។ ការងារទាប មានន័យថា Fed មិនរឹងមាំ ហើយ Fed មិនរឹងមាំ មានន័យថា មានហានិភ័យ»។

សម្រាប់ទីផ្សារអាស៊ី អំឡុងការជួញដូរនាព្រឹកថ្ងៃអង្គារនេះ មិនថា ភាគហ៊ុននៅទីក្រុងតូក្យូ (ជប៉ុន) ហុងកុង (ចិន) សៀងហៃ (ចិន) ស៊ីដនី (អូស្រាលី) សេអ៊ូល (កូរ៉េខាងត្បូង) សិង្ហបុរី (សិង្ហបុរី) តៃប៉ិ (កោះតៃវ៉ាន់) ម៉ានីល (ហ្វីលីពីន) និងហ្សាការតា (ឥណ្ឌូនេស៊ី) សុទ្ធតែមានពណ៌បៃតងទាំងអស់។ បណ្ដាពាណិជ្ជករ កំពុងតាមដានយ៉ាងដិតដល់ ចំពោះកិច្ចពិភាក្សាពាណិជ្ជកម្ម រវាងក្រុងវ៉ាស៊ីនតោន និងដៃគូពាណិជ្ជកម្មរាប់សិបនាក់របស់ខ្លួន បន្ទាប់ពីលោក Trump បានដាក់អត្រាពន្ធ ចន្លោះពី ១០ ទៅ ៤១ ភាគរយលើបណ្ដាប្រទេសទាំងនោះ៕