សហរដ្ឋអាមេរិក កាលពីថ្ងៃចន្ទ (ទី៤ ខែសីហា) បានប្រកាសថា ខ្លួនបានបិទស្ថានទូតរបស់ខ្លួន នៅក្នុងប្រទេសហៃទី និងឲ្យបុគ្គលិកនៅតែក្នុងបរិវេណការទូត បន្ទាប់ពីមានការបាញ់ប្រហារយ៉ាងខ្លាំងក្លា នៅជិតទីក្រុង Port-au-Prince (ព័រអូប្រាំង) រដ្ឋធានីរបស់ហៃទី ដែលត្រូវបានធ្វើឲ្យច្របូកច្របល់ដោយក្រុមអន្ធពាល។

ក្រសួងការបរទេសសហរដ្ឋអាមេរិក បានចេញសេចក្តីជូនដំណឹងមួយនៅលើបណ្ដាញសង្គម X ដោយរាយការណ៍ពី «ការបាញ់ប្រហារយ៉ាងខ្លាំងក្លា នៅក្នុងតំបន់ Tabarre ក្បែរស្ថានទូតសហរដ្ឋអាមេរិក» និងបានណែនាំឲ្យមន្ត្រីរដ្ឋាភិបាលសហរដ្ឋអាមេរិកត្រូវផ្អាកការធ្វើដំណើរផ្លូវការទាំងអស់ នៅខាងក្រៅកន្លែងការទូត ដោយជំរុញឲ្យប្រជាជនជៀសវាងកុំទៅកាន់តំបន់នោះ»។

Tabarre គឺជាក្រុងមួយដែលមានទីតាំងនៅជិតព្រលានយន្តហោះ Port-au-Prince នៅភាគឦសាន្តនៃរដ្ឋធានីរបស់ហៃទី។

អ្នកស្រុកមូលដ្ឋានម្នាក់ បានបញ្ជាក់ប្រាប់អ្នកសារព័ត៌មានថា បានឮការបាញ់កាំភ្លើងយ៉ាងខ្លាំងក្លា តាំងពីពាក់កណ្ដាលព្រឹក ដោយរៀបរាប់ពីការប៉ះទង្គិចគ្នា រវាងនគរបាល និងសមាជិកក្រុមក្មេងអន្ធពាលដែលបានគ្រប់គ្រងផ្នែកខ្លះនៃប្រទេស និងរដ្ឋធានីរបស់ប្រទេសនេះ ចាប់តាំងពីឆ្នាំ២០២៤ មក។

ស្របពេលមានអំពើហិង្សានេះ តាមការបញ្ជាក់របស់នគរបាលជាតិហៃទី (PNH) បានឲ្យដឹងថា អតីតសមាជិកព្រឹទ្ធសភាហៃទី លោក Nenel Cassy ត្រូវបានចាប់ខ្លួនកាលពីថ្ងៃសៅរ៍ចុងសប្ដាហ៍កន្លងមក នៅភោជនីយដ្ឋានមួយកន្លែង ក្នុងទីក្រុង Pétion-Ville ជាយក្រុង Port-au-Prince។

គួរបញ្ជាក់ថា ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស បានរាយការណ៍កាលពីខែកក្កដាថា យ៉ាងហោចណាស់មនុស្ស ៣.១៤១នាក់ ត្រូវបានសម្លាប់នៅក្នុងប្រទេសហៃទី ចន្លោះពីថ្ងៃទី១ ខែមករា ដល់ថ្ងៃទី៣០ ខែមិថុនា៕