ចក្រភពអង់គ្លេស បានឲ្យដឹងថា ខ្លួននឹងចាប់ផ្តើមអនុវត្តកិច្ចព្រមព្រៀង ដើម្បីបញ្ជូនជនអន្តោប្រវេសន៍ដែលទៅដល់តាមទូកតូចៗទៅកាន់ប្រទេសបារាំងវិញ ក្នុងរយៈពេលប៉ុន្មានថ្ងៃខាងមុខ បន្ទាប់ពីសន្ធិសញ្ញា ស្តីពីការរៀបចំ ដែលជាផ្នែកសំខាន់នៃផែនការរបស់អង់គ្លេស ដើម្បីកាត់បន្ថយជនអន្តោប្រវេសន៍ខុសច្បាប់ ត្រូវបានផ្តល់សច្ចាប័ន នៅថ្ងៃអង្គារ (ទី៥ ខែសីហា) នេះ។

នាយករដ្ឋមន្ត្រីអង់គ្លេស លោក Keir Starmer និងប្រធានាធិបតីបារាំង Emmanuel Macron បានប្រកាសគម្រោងសាកល្បង «ម្នាក់ចូល ម្នាក់ចេញ» ស្តីពីការបញ្ជូនត្រលប់ជនអន្តោប្រវេសន៍ ក្នុងខែកក្កដា។

ក្រោមកិច្ចព្រមព្រៀងថ្មីនេះ បារាំងបានយល់ព្រមទទួលយកការបញ្ចូនត្រលប់វិញនូវជនអន្តោប្រវេសន៍ខុសច្បាប់ដែលទៅដល់ចក្រភពអង់គ្លេសដោយទូកតូចៗ ជាថ្នូរនឹងការដែលចក្រភពអង់គ្លេសយល់ព្រមទទួលយកចំនួនស្មើគ្នានៃអ្នកស្វែងរកសិទ្ធិជ្រកកោនស្របច្បាប់ ដែលមានទំនាក់ទំនងជាមួយគ្រួសារ នៅអង់គ្លេស។

សន្ធិសញ្ញា ស្តីពីគម្រោងនេះ ត្រូវបានចុះហត្ថលេខាកាលពីសប្តាហ៍មុន ប៉ុន្តែមិនត្រូវបានប្រកាសឲ្យដឹងនៅមុនឡើយ មុនពេលមានការផ្តល់សច្ចាប័ននៅថ្ងៃទី៥ ខែសីហានេះ។ អង់គ្លេសបានប្រាប់ថា គណៈកម្មការអឺរ៉ុប និងរដ្ឋជាសមាជិកសហភាពអឺរ៉ុប (EU) បានផ្តល់ភ្លើងខៀវដល់ផែនការនេះ។

មនុស្សជាង ២៥.០០០នាក់ បានទៅដល់ប្រទេសអង់គ្លេសតាមទូកតូចៗ រហូតមកដល់ពេលនេះ ក្នុងឆ្នាំ២០២៥ នេះ ហើយរដ្ឋាភិបាល បានកំណត់គោលដៅលើអ្នករត់ពន្ធមនុស្ស ដោយការដាក់ទណ្ឌកម្ម បិទការផ្សាយតាមប្រព័ន្ធផ្សព្វផ្សាយសង្គម និងកំពុងធ្វើការជាមួយក្រុមហ៊ុនដឹកជញ្ជូន ដើម្បីដោះស្រាយការងារខុសច្បាប់ដែលតែងតែត្រូវបានសន្យាផ្ដល់ឲ្យជនអន្តោប្រវេសន៍៕