លោកស្រី បាននិយាយកាលពីថ្ងៃចន្ទថា ស្ថាប័នតុលាការរបស់ប្រទេសអ៊ីតាលី បានទម្លាក់ចោលសំណុំរឿងប្រឆាំងនឹងនាយករដ្ឋមន្ត្រីលោក ស្រី Giorgia Meloni ដែលត្រូវបានដាក់ឲ្យស្ថិតនៅក្រោមការស៊ើបអង្កេតបន្ទាប់ពីការដោះលែងមន្ត្រីនគរបាលលីប៊ីម្នាក់ ដែលតុលាការឧក្រិដ្ឋកម្មអន្តរជាតិតាមចាប់ខ្លួន។

លោក Osama Elmasry Njeem ត្រូវបានដោះលែងកាលពីខែមករា ហើយបានជិះយន្តហោះរដ្ឋរបស់ប្រទេសអ៊ីតាលីទៅប្រទេសកំណើតវិញ រយៈពេលប៉ុន្មានថ្ងៃ បន្ទាប់ពីត្រូវបានឃុំខ្លួននៅទីក្រុង Turin ភាគខាងជើង ក្រោមដីកាចាប់ខ្លួនរបស់តុលាការឧក្រិដ្ឋកម្មអន្តរជាតិ ( ICC) ពីបទឧក្រិដ្ឋកម្មប្រឆាំងមនុស្សជាតិ រួមទាំងឃាតកម្ម ការធ្វើទារុណកម្ម និងការចាប់រំលោភ។

លោកស្រី Meloni បាននិយាយនៅក្នុងការបង្ហោះនៅលើប្រព័ន្ធផ្សព្វផ្សាយសង្គម X ថា៖«ចៅក្រមបានច្រានចោលករណីនេះប្រឆាំងនឹងរូបខ្ញុំតែប៉ុណ្ណោះ»។ លោកស្រី កំពុងស្ថិតនៅក្រោមការស៊ើបអង្កេតជុំវិញ ការចោទប្រកាន់ថា បានជួយ និងសមគំនិតឧក្រិដ្ឋកម្ម និងការប្រើប្រាស់មូលនិធិសាធារណៈមិនត្រឹមត្រូវ។

លោកស្រី Meloni បានបន្ថែមថា ដោយផ្អែកលើឯកសារដែលលោកស្រី បានទទួល ចៅក្រមនឹងបន្តសំណុំរឿងប្រឆាំងនឹងរដ្ឋមន្ត្រីមហាផ្ទៃលោក Matteo Piantedosi រដ្ឋមន្ត្រីក្រសួងយុត្តិធម៌លោក Carlo Nordio និងអនុរដ្ឋមន្ត្រីនៃទីស្តីការគណៈរដ្ឋមន្ត្រីលោក Alfredo Mantovano ដែលត្រូវបានដាក់ឲ្យស្ថិតនៅក្រោមការស៊ើបអង្កេត ជាមួយលោកស្រី។