ប្រទេសជប៉ុនបានជួបប្រទះសីតុណ្ហភាពក្ដៅខ្លាំងបំផុតមិនធ្លាប់មាន គឺ ៤១,៨អង្សាសេ នៅថ្ងៃអង្គារ (ទី៥ សីហា) នេះ ដែលជំរុញឲ្យរដ្ឋាភិបាលណែនាំប្រជាជនឲ្យស្នាក់នៅក្នុងផ្ទះ និងសន្យាចាត់វិធានការ ដើម្បីសម្រាលការខូចខាតដែលទាក់ទងនឹងអាកាសធាតុ ចំពោះដំណាំស្រូវ។

ទីភ្នាក់ងារឧតុនិយមរបស់ប្រទេស បានឲ្យដឹងថា ទីក្រុងភាគខាងកើត Isesaki ក្នុងខេត្ត Gunma បានបង្កើតកំណត់ត្រាក្ដៅខ្លាំងបំផុត ពោលគឺលើសពីកម្រិត ៤១,២អង្សាសេ ដែលកើតមានកាលពីសប្តាហ៍មុន នៅក្នុងទីក្រុងភាគខាងលិច Tamba របស់ខេត្ត Hyogo។

បើយោងតាមទីភ្នាក់ងារគ្រប់គ្រងគ្រោះមហន្តរាយ និងអគ្គិភ័យ បានឲ្យដឹងថា មកទល់ពេលនេះ នារដូវក្តៅនេះ មនុស្សជាង ៥៣.០០០នាក់ហើយ ត្រូវបានបញ្ជូនទៅកាន់មន្ទីរពេទ្យ ដោយសារសុរិយរោគ។

សីតុណ្ហភាពជាមធ្យម នៅទូទាំងប្រទេសជប៉ុន បានបន្តឡើងខ្ពស់ បន្ទាប់ពីមានអាកាសធាតុក្ដៅបំផុត ក្នុងខែកក្កដា ដែលជាការឡើង ៣ឆ្នាំជាប់ៗគ្នា ខណៈដែលតំបន់ភាគឦសានតាមបណ្តោយសមុទ្រជប៉ុន មានភ្លៀងធ្លាក់ក្នុងកម្រិតទាបខ្លាំង ដែលធ្វើឲ្យមានក្ដីបារម្ភ អំពីការប្រមូលផលស្រូវ។

រដ្ឋមន្ត្រីក្រសួងកសិកម្ម លោក Shinjiro Koizumi បានប្រាប់នៅឯសន្និសីទសារព័ត៌មានមួយថា៖ «យើងត្រូវចាត់វិធានការឲ្យបានលឿន និងបន្ទាន់ ដើម្បីបង្ការការខូចខាត ដោយសារសីតុណ្ហភាពឡើងក្ដៅខ្លាំង»។ លោកបានបន្ថែមថា រដ្ឋាភិបាលនឹងផ្តល់ការគាំទ្រ ជុំវិញការកម្ចាត់សត្វល្អិត និងវិធានការដោះស្រាយគ្រោះរាំងស្ងួត៕