សហជីពធំៗចំនួន ១០ និងសម្ព័ន្ធសហជីពកសិករឥណ្ឌាជាង ៤០ បានប្រកាសពីការតវ៉ាទូទាំងប្រទេសនៅថ្ងៃទី១៣ ខែសីហា ប្រឆាំងនឹងកិច្ចព្រមព្រៀងពាណិជ្ជកម្មឥណ្ឌា-ចក្រភពអង់គ្លេស នាពេលថ្មីៗនេះ និងគម្រោងរបស់ប្រធានាធិបតីអាមេរិក លោក Donald Trump ក្នុងការដាក់ពន្ធ ២៥ភាគរយ លើទំនិញឥណ្ឌា ដោយសារការមានពាណិជ្ជកម្មប្រេងរបស់ប្រទេសនេះ ជាមួយរុស្ស៊ី។

សហជីពបានចាត់ចំណាត់ការរបស់រដ្ឋបាលរបស់លោក Trump ថា ជា «ការសម្លុតកំហែងផ្នែកសេដ្ឋកិច្ចយ៉ាងជាក់ស្ដែង» ហើយបានអំពាវនាវឲ្យពលរដ្ឋប្រឆាំងនឹងវិធានការនេះ។

យោងតាមសេចក្ដីថ្លែងការណ៍មួយ បានឲ្យដឹងថា អ្នករៀបចំព្រឹត្តិការណ៍តវ៉ានេះ បានអំពាវនាវដល់ «កសិករ កម្មករ និស្សិត និងប្រជាពលរដ្ឋស្នេហាជាតិទាំងអស់ ចូលរួមទិវាតស៊ូទូទាំងប្រទេស នៅថ្ងៃទី១៣ ខែសីហា ឆ្នាំ២០២៥ ដោយមានសកម្មភាពមហាជនជាច្រើន ដូចជាក្បួនត្រាក់ទ័រ និងម៉ូតូ បាតុកម្មតវ៉ា ការប្រមូលផ្តុំសាធារណៈ និងការតវ៉ាតាមទម្រង់ផ្សេងៗ តាមការសម្រេចរបស់វេទិកា និងអង្គការដៃគូផ្សេងៗ»។

បន្ថែមពីលើនេះ ក្រុមទាំងនោះបានទាមទារឲ្យរដ្ឋាភិបាលឥណ្ឌាគួរតែប្រកាន់ជំហររឹងមាំ ប្រឆាំងនឹងការគំរាមកំហែងដំឡើងពន្ធគយ និងអះអាងសិទ្ធិរបស់ខ្លួន ក្នុងការធ្វើពាណិជ្ជកម្មដោយសេរីជាមួយប្រទេសទាំងអស់ ក្នុងនោះរួមទាំងរុស្ស៊ីផងដែរ។

ទន្ទឹមនឹងនេះ អ្នករៀបចំបានចោទប្រកាន់ថា កិច្ចព្រមព្រៀងពាណិជ្ជកម្មសេដ្ឋកិច្ចគ្រប់ជ្រុងជ្រោយឥណ្ឌា-ចក្រភពអង់គ្លេស (CETA) កំពុងអនុវត្តចក្រពត្តិសាជីវកម្ម ខណៈដែលទាមទារឲ្យកិច្ចព្រមព្រៀងពាណិជ្ជកម្មនាពេលអនាគត ត្រូវបានបញ្ចប់ដោយតម្លាភាពទាំងស្រុង និងដោយមានការចូលរួមពីភាគីពាក់ព័ន្ធទាំងអស់៕