ក្រុមសកម្មជននិស្សិតរាប់ម៉ឺននាក់ មកពីក្រុមនយោបាយផ្សេងៗជាច្រើន បានដង្ហែរក្បួនដោយស្ងប់ស្ងៀមឆ្លងកាត់ដងវិថីនានានៅថ្ងៃអង្គារនេះ ដើម្បីបារព្ធខួប ១ឆ្នាំនៃបះបោរទ្រង់ទ្រាយធំដឹកនាំដោយក្រុមនិស្សិត ដែលបង្ខំឲ្យលោកស្រីអតីតនាយករដ្ឋមន្រ្តី Sheikh Hasina លាលែងពីតំណែង ក្រោយកាន់អំណាចអស់រយៈពេល ១៥ឆ្នាំ ។

ដោយស្រែកពាក្យស្លោក “ជីវិតល្អប្រសើរសម្រាប់បង់ក្លាដែស” ក្រុមដង្ហែរក្បួនបានប្រារព្ធអ្វីដែលពួកគេចាត់ទុកថា ជាចំណុចផ្លាស់ប្តូរនៅក្នុងប្រវត្តិសាស្រ្តប្រទេសមួយនេះ ជាមួយនឹងទង់ជាតិ និងបដា នៅក្នុងដៃរបស់ពួកគេ ។

លោក Yeasir Arafat គឺជាមេដឹកនាំប្រចាំស្រុក Kushtia សម្រាប់គណបក្សពលរដ្ឋជាតិ(NCP) ដែលបានចេញធ្វើបាតុកម្មកាលពីឆ្នាំ ២០២៤ និយាយថា ពលរដ្ឋចង់ធានាថា អាកប្បកិរិយា និងទំនោរផ្តាច់ការបែបនេះ នឹងពុំត្រូវបានមើលឃើញម្តងទៀតនោះទេ ។

ចលនាបាតុកម្មដែលផ្តើមចេញពីការទាមទារឲ្យមានកំណែទម្រង់ច្បាប់កូតា បង្កឲ្យមានបាតុកម្មទូទាំងប្រទេស បណ្តាលឲ្យមនុស្សជាង ១ពាន់នាក់ស្លាប់ មុនពេលលោកស្រី Hasina លាលែងពីតំណែង ហើយលោកស្រី បានរត់ភៀសខ្លួនទៅកាន់ប្រទេសជិតខាងឥណ្ឌា នៅថ្ងៃទី ៥ ខែសីហា ឆ្នាំ ២០២៤ ៕