នៅថ្ងៃអង្គារ (ទី៥ ខែសីហា) នេះ រុស្ស៊ីបានចោទប្រកាន់សហរដ្ឋអាមេរិកថា បានអនុវត្តសម្ពាធពាណិជ្ជកម្មខុសច្បាប់ លើប្រទេសឥណ្ឌា បន្ទាប់ពីប្រធានាធិបតីអាមេរិក លោក Donald Trump បានគំរាមជាថ្មីម្តងទៀតថា នឹងដំឡើងពន្ធលើទីក្រុងញូវដេលី ពាក់ព័ន្ធនឹងការទិញប្រេងពីរុស្ស៊ី។

អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកសារព័ត៌មានថា៖ «យើងបានឮសេចក្តីថ្លែងការណ៍ជាច្រើនដងដែលជាការគំរាមកំហែងពិតប្រាកដ ពោលគឺប៉ុនប៉ងបង្ខំឲ្យប្រទេសនានាកាត់ទំនាក់ទំនងពាណិជ្ជកម្មជាមួយរុស្ស៊ី។ យើងមិនចាត់ទុកសេចក្តីថ្លែងការណ៍បែបនេះថា ស្របច្បាប់នោះឡើយ»។

លោកបានបញ្ជាក់បន្ថែមថា៖ «យើងជឿជាក់ថា ប្រទេសដែលមានអធិបតេយ្យភាព គួរតែមាន និងពិតជាមានសិទ្ធិជ្រើសរើសដៃគូពាណិជ្ជកម្មផ្ទាល់ខ្លួន ពោលគឺដៃគូ សម្រាប់កិច្ចសហប្រតិបត្តិការពាណិជ្ជកម្ម និងសេដ្ឋកិច្ច ហើយជ្រើសរើសទម្រង់នៃកិច្ចសហប្រតិបត្តិការពាណិជ្ជកម្ម និងសេដ្ឋកិច្ច សម្រាប់ប្រទេសទាំងនោះដោយផ្ទាល់ ដែលជាផលប្រយោជន៍ជាក់លាក់របស់ប្រទេសមួយ»។

គួរបញ្ជាក់ថា លោក Trump បាននិយាយថា ចាប់ពីថ្ងៃសុក្រតទៅ លោកនឹងដាក់ទណ្ឌកម្មថ្មីលើរុស្ស៊ី ក៏ដូចជាប្រទេសដែលទិញការនាំចេញថាមពលរបស់ប្រទេសនេះ ប្រសិនបើក្រុងមូស្គូមិនចាត់វិធានការ ដើម្បីបញ្ចប់ជម្លោះ ៣ឆ្នាំកន្លះរបស់ខ្លួនជាមួយអ៊ុយក្រែនទេនោះ។

ប្រធានាធិបតីរុស្ស៊ី លោក Vladimir Putin មិនបានបង្ហាញសញ្ញាផ្លាស់ប្តូរគោលជំហររបស់រុស្ស៊ី ជុំវិញសង្រ្គាមនោះឡើយ បើទោះបីជាពេលវេលាកំណត់កំពុងលេចស្រមោលស្ទុងៗក៏ដោយ៕