ក្រសួងការពារជាតិរុស្ស៊ី បាននិយាយនៅថ្ងៃអង្គារ (០៥ សីហា) ថា កងកម្លាំងរុស្ស៊ី ដែលកំពុងវាយរុលទៅមុខយឺតៗឆ្លងកាត់ភាគខាងកើតអ៊ុយក្រែន បានវាយដណ្តើមបានភូមិ Sichneve ថ្មីមួយនៅក្នុងតំបន់ Dnipropetrovsk ភាគខាងកើតប៉ែកកណ្តាលរបស់អ៊ុយក្រែន។

កងកម្លាំងរុស្ស៊ី បាននិងកំពុងវាយរុញឆ្ពោះទៅភាគខាងលិចអ៊ុយក្រែនអស់ជាច្រើនខែមកហើយ តាមបណ្ដោយជួរមុខ ១ពាន់គីឡូម៉ែត្រ ដោយដណ្ដើមយកភូមិថ្មីៗស្ទើរតែរាល់ថ្ងៃ ភាគច្រើនក្នុងតំបន់ Donetsk ។ អាជ្ញាធរនៅទីក្រុងគីវ មិនបាននិយាយពីការអះអាងរបស់ទីក្រុងមូស្គូ ក្នុងការកាន់កាប់ភូមិនៅតំបន់ Dnipropetrovsk ចុងក្រោយនេះទេ ហើយបានបដិសេធអស់ជាច្រើនសប្តាហ៍មកហើយថា កងកម្លាំងរុស្ស៊ី មិនបានចូលទៅក្នុងតំបន់នោះឡើយ។

យោធាអ៊ុយក្រែននិយាយថា កងកម្លាំងរបស់ខ្លួនកំពុងកាន់កាប់យ៉ាងរឹងមាំនៅទីតាំងជួរមុខរបស់ពួកគេ ហើយកាលពីថ្ងៃចន្ទបានចេញការបដិសេធយ៉ាងមុតមាំថា កងទ័ពរបស់ខ្លួនមិនត្រូវបានឡោមព័ទ្ធឡើយនៅក្រុង Pokrovsk ដែលជាមជ្ឈមណ្ឌលដឹកជញ្ជូនដ៏សំខាន់នៅតំបន់ Donetsk ដែលនៅក្រោមការវាយប្រហារយ៉ាងធ្ងន់ធ្ងរអស់ជាច្រើនខែ។

ឥឡូវនេះ កងកម្លាំងរុស្ស៊ីកាន់កាប់ប្រហែល ២០% នៃទឹកដីអ៊ុយក្រែន ចាប់តាំងពីប្រតិបត្តិការយោធាពិសេសក្នុងខែកុម្ភៈ ឆ្នាំ២០២២មក ហើយបានដាក់បញ្ចូលតំបន់ចំនួន៤ ជាផ្លូវការគឺ Donetsk, Luhansk, Kherson និង Zaporizhzhia ។ ទីក្រុងមូស្គូនិយាយថា ខ្លួនគ្រប់គ្រងពេញលេញលើតំបន់ Luhansk និងកាន់កាប់ផ្នែកខ្លះទៀត បូករួមទាំងឧបទ្វីបគ្រីម៉េ ដែលខ្លួនដណ្តើមបានក្នុងឆ្នាំ ២០១៤៕