សារព័ត៌មាន Interfax របស់រុស្ស៊ីបានរាយការណ៍នៅថ្ងៃពុធនេះថា នាវាកងទ័ពជើងទឹករុស្ស៊ី និងចិននឹងធ្វើការល្បាតរួមគ្នានៅក្នុងតំបន់អាស៊ី-ប៉ាស៊ីហ្វិក បន្ទាប់ពីការធ្វើសមយុទ្ធនាពេលថ្មីៗនេះនៅសមុទ្រជប៉ុន។

ដោយដកស្រង់សេចក្តីថ្លែងការណ៍ពីសេវាសារព័ត៌មានរបស់កងនាវាចរប៉ាស៊ីហ្វិករុស្ស៊ី សារព័ត៌មាន Interfax បាននិយាយថា ក្រុមនាវិកនៃកងទ័ពជើងទឹករុស្ស៊ី និងកងទ័ពជើងទឹក PLA របស់ចិន នឹងបង្កើតក្រុមការងារថ្មីមួយ ដើម្បីអនុវត្តបេសកកម្មល្បាតរួមគ្នានៅក្នុងតំបន់អាស៊ី-ប៉ាស៊ីហ្វិក ។

កងទ័ពជើងទឹកទាំងពីរបានធ្វើសមយុទ្ធរួមគ្នានៅសមុទ្រជប៉ុនចាប់ពីថ្ងៃទី ១ដល់៥ ខែសីហា ដែលរួមមានការបាញ់កាំភ្លើងធំ ការអនុវត្តបេសកកម្មប្រឆាំងនាវាមុជទឹក និងការពារដែនអាកាស ការពង្រឹងប្រតិបត្តិការស្វែងរក និងជួយសង្គ្រោះរួមគ្នានៅសមុទ្រ។

ក្នុងដំណាក់កាលចុងក្រោយនៃសមយុទ្ធ នាវាប្រឆាំងនាវាមុជទឹកដ៏ធំរបស់រុស្ស៊ី Admiral Tributs និង corvette Gromky រួមជាមួយនឹងនាវាពិឃាតចិន Shaoxing និង Urumqi បានធ្វើសមយុទ្ធហ្វឹកហ្វឺនបាញ់គ្រាប់ពិត ហើយក្រុមនាវិកបានអនុវត្តការស្វែងរក និងកម្ទេចនាវាមុជទឹករបស់សត្រូវ។

កងនាវាចរប៉ាស៊ីហ្វិករបស់រុស្ស៊ី បាននិយាយមុននេះថា សមយុទ្ធនេះគឺការពារធម្មជាតិ និងមិនមានទិសដៅប្រឆាំងចំពោះប្រទេសផ្សេងទៀតឡើយ ៕