ឱនភាពពាណិជ្ជកម្មសរុបរបស់សហរដ្ឋអាមេរិក បានរួមតូចនៅខែមិថុនាកន្លងទៅ ក្នុងកម្រិតទាបបំផុតរយៈពេល ២ឆ្នាំ ដោយសារការធ្លាក់ចុះផ្នែកនាំចូលទំនិញប្រើប្រាស់ ហើយគម្លាតពាណិជ្ជកម្មជាមួយចិន ក៏ធ្លាក់ដល់កម្រិតទាបបំផុតក្នុងរយៈពេលជាង ២១ឆ្នាំផងដែរ នៅក្នុងភស្តុតាងចុងក្រោយបង្អស់នៃឥទ្ធិពលរបាំងពាណិជ្ជកម្មសកលរបស់លោកប្រធានាធិបតី Donald Trump លើទំនិញនាំចូល។

ការិយាល័យវិភាគសេដ្ឋកិច្ចរបស់ក្រសួងពាណិជ្ជកម្មអាមេរិក បាននិយាយកាលពីថ្ងៃអង្គារ (០៥ សីហា) ថា គម្លាតពាណិជ្ជកម្មរួម បានធ្លាក់មកតូចខ្លាំងក្នុងអត្រា ១៦,០% នៅក្នុងខែមិថុនា ដល់ ៦០,២ពាន់លានដុល្លារ។ ប៉ុន្មានថ្ងៃបន្ទាប់ពីរបាយការណ៍ថា ឱនភាពពាណិជ្ជកម្មទំនិញធ្លាក់ចុះ ១០,៨% ដល់កម្រិតទាបបំផុតចាប់តាំងពីខែកញ្ញា ឆ្នាំ២០២៣មក រដ្ឋាភិបាលបាននិយាយថា ឱនភាពពេញលេញ រួមទាំងផ្នែកសេវាកម្មក៏ធ្លាក់ទាបបំផុតដែរ ចាប់តាំងពីពេលវេលាដដែលនោះមក ដោយសារសម្ពាធពន្ធ។

ទិន្នន័យបង្ហាញថា ការនាំចេញទំនិញ និងសេវាកម្ម សរុបមានចំនួន ២៧៧,៣ពាន់លានដុល្លារ ធ្លាក់ពីតួលេខជាង ២៧៨ពាន់លានដុល្លារក្នុងខែឧសភា ខណៈការនាំចូលសរុបមានចំនួន ៣៣៧,៥ពាន់លានដុល្លារ ដោយថយពី ៣៥០,៣ពាន់លានដុល្លារ នៅរយៈពេលដូចគ្នា។ ចំណុចកណ្តាលនៃរបាយការណ៍កាលពីថ្ងៃអង្គារនោះគឺជាការធ្លាក់ចុះយ៉ាងខ្លាំងចុងក្រោយបំផុតនៃឱនភាពពាណិជ្ជកម្មរបស់អាមេរិក ជាមួយចិន ប្រហែលមួយភាគបីទៅចំនួន ៩,៥ពាន់លានដុល្លារ ក្នុងខែមិថុនា ដល់កម្រិតតូចបំផុតចាប់តាំងពីខែកុម្ភៈ ឆ្នាំ២០០៤មក។ ក្នុងរយៈពេលប្រាំខែជាប់ៗគ្នានៃការធ្លាក់ចុះ ឱនភាពបានរួមតូចចំនួន ២២,២ពាន់លានដុល្លារ ពោលគឺអត្រាថយចុះ ៧០%។

ជាមួយនឹងអត្រាពន្ធបដិការចាប់ពី ១០% ទៅ ៤១% លើការនាំចូលសកលទៅកាន់អាមេរិក ដែលគ្រោងចាប់ផ្តើមនៅថ្ងៃទី០៧ ខែសីហា ខាងមុខ មន្ទីរ Budget Lab នៅសកលវិទ្យាល័យ Yale របស់អាមេរិក បានប៉ាន់ប្រមាណថា ឥឡូវនេះ អត្រាពន្ធសរុបជាមធ្យមរបស់អាមេរិក កើនឡើងដល់ ១៨,៣% ដែលជាកម្រិតខ្ពស់បំផុតចាប់តាំងពីឆ្នាំ១៩៣៤មក ពីអត្រារវាង ២% និង ៣% មុនពេលលោក Trump ត្រឡប់ទៅសេតវិមានក្នុងខែមករា៕