នៅក្នុងការសាកល្បងលើកដំបូងរបស់ខ្លួនជាមួយនឹងការល្បាតរបស់សហភាពអឺរ៉ុបនៅសមុទ្រក្រហមកាលពីឆ្នាំមុន ប្រព័ន្ធប្រឆាំងយានដ្រូនផលិតដោយប្រទេសក្រិក បានបង្ហាញពីអ្វីដែលជាសមត្ថភាពរបស់វា។

ប្រព័ន្ធនេះបានបាញ់ទម្លាក់យានដ្រូនចំនួនពីរគ្រឿងបង្ហោះដោយក្រុមហ៊ូទីនៅប្រទេសយេម៉ែន និងបណ្តាលឱ្យយានដ្រូនពីរគ្រឿងផ្សេងទៀតជាប់គាំងប្រព័ន្ធអេឡិចត្រូនិករបស់វា។ នេះបើយោងតាមលោក Kyriakos Enotiadis នាយកផ្នែកអេឡិចត្រូនិកនៅក្រុមហ៊ុនឧស្សាហកម្មអវកាស Hellenic (HAI) គ្រប់គ្រងដោយរដ្ឋ ដែលផលិតប្រព័ន្ធប្រឆាំងយានដ្រូន។ លោកនិយាយថា មានក្រុមហ៊ុនធំៗច្រើនដែលខ្ញុំចង់និយាយថា ជាក្រុមហ៊ុនផលិតប្រព័ន្ធប្រឆាំងយានដ្រូនអេឡិចត្រូនិក ប៉ុន្តែគ្មានក្រុមហ៊ុនណាមួយក្នុងចំណោមពួកគេត្រូវបានបង្ហាញភស្តុតាងនៅសមរភូមិទេ»។

ការសាកល្បងដោយជោគជ័យបានបន្ថែមកម្លាំងជំរុញដល់រដ្ឋាភិបាលក្រិក ដែលគ្រោងនឹងអភិវឌ្ឍឧស្សាហកម្មផលិតក្នុងស្រុកសម្រាប់ប្រព័ន្ធប្រឆាំងយានដ្រូននិងប្រព័ន្ធយានដ្រូន ជាផ្នែកនៃកម្មវិធីមានតម្លៃជិត៣៥ពាន់លានដុល្លារក្នុងគោលបំណងធ្វើទំនើបកម្មកងកម្លាំងប្រដាប់អាវុធរបស់ប្រទេសនេះនៅឆ្នាំ ២០៣៦។ ប្រទេសក្រិកចំណាយជិត ៣,៥% នៃផលិតផលក្នុងស្រុកសរុបរបស់ខ្លួនលើវិស័យការពារជាតិ ដោយសារតែជម្លោះយូរអង្វែងជាមួយប្រទេសទួរគី។ ប្រទេសទួរគី ដែលជាប្រទេសជិតខាងនិងជាសម្ព័ន្ធមិត្តរបស់អង្គការNATO ជាអ្នកនាំចេញយានដ្រូនដ៏ធំ។ រហូតមកដល់ពេលនេះ ប្រទេសក្រិក បានប្រើប្រាស់យានដ្រូនមួយចំនួនដែលភាគច្រើនផលិតនៅបរទេស។ ប៉ុន្តែនៅក្នុងទសវត្សរ៍ខាងមុខនេះ ប្រទេសក្រិកគ្រោងនឹងបញ្ចូលបច្ចេកវិទ្យាយានដ្រូនគ្រប់ប្រភេទទៅក្នុងកងកម្លាំងប្រដាប់អាវុធរបស់ខ្លួន ហើយវិនិយោគប្រហែល៩២៥លានដុល្លារក្នុងនវានុវត្តន៍ផ្នែកការពារជាតិ។