អ៊ីស្រាអែល បានកោះប្រជុំបន្ទាន់របស់ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃអង្គារ (០៥ សីហា) ទាមទារឱ្យមានការដោះលែងចំណាប់ថ្នូរនៅតំបន់ហ្កាហ្សា ដោយនិយាយថា ក្រុមសកម្មប្រយុទ្ធប៉ាឡេស្ទីនហាម៉ាស បានបង្អត់អាហារអ្នកជាប់ឃុំទាំងនោះ រួមទាំងមនុស្សម្នាក់ ដែលត្រូវបានមើលឃើញក្នុងវីដេអូថាកំពុងជីកផ្នូរឱ្យខ្លួនឯង។ ស្ថានភាពរបស់ចំណាប់ថ្នូរបានទាក់ទាញការអាណិតអាសូរយ៉ាងទូលំទូលាយ - ប៉ុន្តែប្រជាជនប៉ាឡេស្ទីន ២លាននាក់ ដែលកំពុងអត់ឃ្លាននៅហ្កាហ្សា ទទួលបានការអាណិតកាន់តែច្រើនថែមទៀត។

មិនត្រឹមតែប្រជាជនប៉ាឡេស្ទីនប៉ុណ្ណោះទេ ប៉ុន្តែពេលនេះ សមាជិកក្រុមប្រឹក្សាអ.ស.ប ភាគច្រើនបានស្តីបន្ទោសរដ្ឋាភិបាល និងយោធាអ៊ីស្រាអែល ចំពោះការបិទផ្លូវជំនួយរយៈពេលពីរខែចូលទៅហ្កាហ្សា និងការខកខានមិនអនុញ្ញាតឱ្យមានស្បៀងអាហារគ្រប់គ្រាន់ ស្របពេលអាជ្ញាធរសុខាភិបាលហ្កាហ្សា បានរាយការណ៍ថា មានមនុស្សស្លាប់ជាង ១០០នាក់ហើយពីភាពអត់ឃ្លាន រួមទាំងកុមារជាច្រើនផងដែរ។

រដ្ឋមន្ត្រីការបរទេសអ៊ីស្រាអែល លោក Gideon Saar ដែលហោះទៅទីក្រុងញូវយ៉កចូលរួមកិច្ចប្រជុំក្រុមប្រឹក្សានេះ បានចោទក្រុមហាម៉ាស និងក្រុមជីហាតអ៊ីស្លាម ថាបង្អត់អាហារចំណាប់ថ្នូរ ដែលខ្លួនបានចាប់ក្នុងការវាយប្រហារលើភាគខាងត្បូងអ៊ីស្រាអែល ថ្ងៃទី០៧ ខែតុលា ឆ្នាំ២០២៣ ។

លោក Saar ទទូចថា អ៊ីស្រាអែលសម្របសម្រួល "ជំនួយដ៏ច្រើនទៅកាន់ហ្កាហ្សារួចហើយ" ដោយចោទហាម៉ាសថាលួចស្បៀង និងរបស់របរផ្សេងទៀត ហើយប្រើជា "ឧបករណ៍ហិរញ្ញវត្ថុ" ដើម្បីលក់ និងរកប្រាក់ចំណេញ ប៉ុន្តែអ្នកនាំពាក្យអង្គការសហប្រជាជាតិ លោក Stephane Dujarric និយាយថា ពុំមានភស្តុតាងអះអាងរឿងនេះបានទេ៕