អ្នកនាំពាក្យវិមានក្រឹមឡាំង លោក Dmitry Peskov បានប្រាប់ទីភ្នាក់ងារព័ត៌មានរដ្ឋ TASS របស់រុស្ស៊ី ក្នុងសុន្ទរកថាចេញផ្សាយនៅថ្ងៃពុធ (០៦ សីហា) នេះថា ការកែលម្អទំនាក់ទំនងរវាងរុស្ស៊ី និងអាមេរិក នឹងត្រូវការពេលវេលាបន្តិច។ លោក Peskov បានប្រាប់ TASS ថា "ពិតណាស់មាននិចលភាព (ភាពប្រែប្រួលលឿនយឺត) នៅក្នុងដំណើរការនេះ" ដោយសំដៅលើអវត្តមានដ៏យូរនៃកិច្ចប្រជុំរវាងប្រធានាធិបតីរុស្ស៊ី លោក Vladimir Putin និងលោកប្រធានាធិបតីអាមេរិក Donald Trump។

អ្នកនាំពាក្យរូបនេះបន្តថា "គេត្រូវការពេលវេលាសម្រាប់កិច្ចខិតខំប្រឹងប្រែងដើម្បីនាំទំនាក់ទំនងទ្វេភាគីត្រឡប់ទៅរកផ្លូវធម្មតាវិញ"។ TASS បានរាយការណ៍ថា នេះជាលើកដំបូងហើយក្នុងប្រវត្តិសាស្ត្ររុស្ស៊ីសម័យទំនើប ដែលរយៈពេលជាង ៦ខែបានកន្លងផុតទៅចាប់តាំងពីការចូលកាន់តំណែងរបស់ប្រធានាធិបតីអាមេរិកថ្មី ដោយពុំមានជំនួបកំពូលជាមួយមេដឹកនាំរុស្ស៊ី។

ទំនាក់ទំនងរុស្ស៊ី-អាមេរិក ជួបកំណើនភាពតានតឹងក្នុងប៉ុន្មានសប្តាហ៍ថ្មីៗ ដោយលោក Trump និយាយថា លោកបញ្ជាឱ្យនាវាមុជទឹកនុយក្លេអ៊ែរ ២គ្រឿងផ្លាស់ទៅក្នុង "តំបន់សមស្រប" ដើម្បីឆ្លើយតបនឹងការលើកឡើងរបស់អតីតប្រធានាធិបតីរុស្ស៊ី លោក Dmitry Medvedev។

លោក Trump ក៏បានចេញឱសានវាទដល់លោក Putin ដោយទាមទារឱ្យមានបទឈប់បាញ់ក្នុងសង្រ្គាមរុស្ស៊ីនៅអ៊ុយក្រែន និងកិច្ចព្រមព្រៀងសន្តិភាពផ្លូវការត្រឹមថ្ងៃសុក្រ ០៨ សីហា ខាងមុខនេះ។ លើសពីនេះ លោក Trump គំរាមរុស្ស៊ីជាមួយនឹងទណ្ឌកម្មថ្មី និងដាក់ពន្ធ ១០០% លើប្រទេសណាដែលទិញប្រេងរុស្ស៊ី លុះត្រាតែលោក Putin យល់ព្រមលើបទឈប់បាញ់ក្នុងសង្គ្រាម៕