អ្នកនាំពាក្យវិមានក្រឹមឡាំង លោក Dmitry Peskov បាននិយាយកាលពីថ្ងៃអង្គារថា ប្រទេសមានអធិបតេយ្យភាព មានសិទ្ធិជ្រើសរើសដៃគូពាណិជ្ជកម្ម និងសេដ្ឋកិច្ចរបស់ខ្លួនដោយផ្អែកលើផលប្រយោជន៍ផ្ទាល់ខ្លួនរបស់ពួកគេ។

លោក Peskov និយាយថា «យើងជឿថាប្រទេសមានអធិបតេយ្យភាពត្រូវតែមានសិទ្ធិជ្រើសរើសដោយឯករាជ្យនូវដៃគូសហប្រតិបត្តិការពាណិជ្ជកម្ម និងសេដ្ឋកិច្ចរបស់ខ្លួន ព្រមទាំងកំណត់ទម្រង់នៃកិច្ចសហប្រតិបត្តិការដែលស្របតាមផលប្រយោជន៍ផ្ទាល់ខ្លួន» ដោយលោក Peskov បាននិយាយសំដៅលើការគំរាមកំហែងដំឡើងពន្ធរបស់សហរដ្ឋអាមេរិកទៅលើប្រទេសឥណ្ឌា។

លោក បាននិយាយថា មានសេចក្តីថ្លែងការណ៍ជាច្រើនមានបំណងបង្ខិតបង្ខំប្រទេសនានាឱ្យផ្តាច់ទំនាក់ទំនងពាណិជ្ជកម្មជាមួយរុស្ស៊ី ដោយចាត់ទុកថាការព្រមានបែបនេះគឺខុសច្បាប់។ កាលពីថ្ងៃចន្ទ សប្តាហ៍នេះ ប្រធានាធិបតីអាមេរិក លោក Donald Trump បាននិយាយនៅក្នុងការបង្ហោះនៅលើវេទិកា Truth Social ថា លោកនឹងដំឡើងពន្ធលើប្រទេសឥណ្ឌា ជុំវិញការនាំចូលនិងលក់បន្តនូវប្រេងរបស់រុស្ស៊ី។

កាលពីថ្ងៃអង្គារ លោក Trump បាននិយាយជាថ្មីនូវការគំរាមកំហែងដំឡើងពន្ធលើប្រទេសឥណ្ឌាក្នុងបទសម្ភាសជាមួយប្រព័ន្ធផ្សព្វផ្សាយ CNBC ថា «យើងដាក់ការដំឡើងពន្ធ២៥ភាគរយ ប៉ុន្តែខ្ញុំគិតថាខ្ញុំនឹងបង្កើនវាក្នុងរយៈពេល២៤ម៉ោងខាងមុខព្រោះប្រទេសនេះកំពុងទិញប្រេងពីរុស្ស៊ី»។ ទន្ទឹមនឹងនេះ ប្រធានាធិបតីអាមេរិកបាននិយាយថា «ឥណ្ឌាពុំមែនជាដៃគូពាណិជ្ជកម្មដ៏ល្អនោះទេ»។