រយៈពេល ៣ឆ្នាំ បន្ទាប់ពីប្រធានាធិបតីរុស្ស៊ី លោក Vladimir Putin បានចាប់ផ្តើមការលុកលុយទ្រង់ទ្រាយធំរបស់លោក លើប្រទេសអ៊ុយក្រែន សហរដ្ឋអាមេរិក និងសហភាពអឺរ៉ុប (EU) នៅតែនាំចូលថាមពល និងទំនិញពីរុស្ស៊ី ដែលមានតម្លៃរាប់ពាន់លានដុល្លារ រាប់ចាប់ពីឧស្ម័នធម្មជាតិរាវ រហូតដល់សារធាតុអ៊ុយរ៉ានីញ៉ូមចម្រាញ់ហើយ។

ចាប់តាំងពីដើមដំបូងនៃសង្គ្រាម ពាណិជ្ជកម្ម រវាងសហភាពអឺរ៉ុប (EU) និងរុស្ស៊ី បានថយចុះយ៉ាងខ្លាំងដោយសារតែការដាក់ទណ្ឌកម្ម និងការរឹតបន្តឹងរបស់សហភាពអឺរ៉ុប លើការនាំចូលផលិតផលមួយចំនួន។ យោងតាមទិន្នន័យចុងក្រោយពីស្ថាប័នស្ថិតិ Eurostat បានឲ្យដឹងថា ការនាំចូលពីរុស្ស៊ី បានធ្លាក់ចុះ ៨៦ភាគរយ ពីត្រីមាសទី១ ឆ្នាំ២០២២ រហូតដល់ត្រីមាសទី១ ឆ្នាំ២០២៥។

ការនាំចូលទំនិញពីរុស្ស៊ី ក្នុងត្រីមាសទី១ នៃឆ្នាំ២០២៥ មានចំនួនសរុប ៨,៧៤ពាន់លានអឺរ៉ូ (១០,១១ពាន់លានដុល្លារ) ដោយធ្លាក់ចុះពីកម្រិត ៣០,៥៨ពាន់លានអឺរ៉ូ កាលពី ៤ឆ្នាំមុន។ តាំងពីខែមករា ឆ្នាំ២០២២ មក EU បាននាំចូលទំនិញរបស់រុស្ស៊ី ដែលមានតម្លៃ ២៩៧ពាន់លានអឺរ៉ូ។ តែយ៉ាងណាក្ដី EU នៅបន្តទិញប្រេង នីកែល ឧស្ម័នធម្មជាតិ ជី ដែក និងដែកថែបពីរុស្ស៊ី។

កាលពី ៤ឆ្នាំមុន រុស្ស៊ីគឺជាអ្នកផ្គត់ផ្គង់ផលិតផលប្រេងដ៏ធំបំផុតជាងគេទៅកាន់ EU ប៉ុន្តែការហាមឃាត់របស់ EU លើការនាំចូលប្រេងឆៅតាមសមុទ្ររបស់រុស្ស៊ី បានកាត់បន្ថយភាគហ៊ុនរបស់ខ្លួនមកត្រឹម ២,០១ភាគរយ នៅឆ្នាំ២០២៥ ពោលគឺថយពីចំនួន ២៨,៧៤ភាគរយ នៅឆ្នាំ២០២១។ ការនាំចូលប្រេងបានធ្លាក់ចុះមកត្រឹម ១,៤៨ពាន់លានអឺរ៉ូ ក្នុងត្រីមាសទី១ ឆ្នាំ២០២៥ ដោយធ្លាក់ពីចំនួន ១៤,០៦ពាន់លានអឺរ៉ូ កាលពី ៤ឆ្នាំមុន។ ភាគហ៊ុនរបស់រុស្ស៊ី នៅក្នុងឧស្ម័នធម្មជាតិ បានធ្លាក់ចុះដល់ ១៧ភាគរយ នៅក្នុងត្រីមាសទី១ នៃឆ្នាំ២០២៥ ដោយធ្លាក់ពី ៤៨ភាគរយ នៅក្នុងត្រីមាសទី១ នៃឆ្នាំ២០២១។

ដោយឡែកបើយោងតាមការិយាល័យជំរឿនអាមេរិក និងទិន្នន័យការិយាល័យវិភាគសេដ្ឋកិច្ចអាមេរិក បានបង្ហាញថា ការនាំចូលរបស់សហរដ្ឋអាមេរិកពីរុស្ស៊ី បានធ្លាក់ចុះមកនៅត្រឹម ២,៥ពាន់លានដុល្លារអាមេរិក នៅក្នុងឆមាសទី១ នៃឆ្នាំ២០២៥ ដោយថយពីចំនួន ១៤,១៤ពាន់លានដុល្លារ កាលពី ៤ឆ្នាំមុន។ ចាប់តាំងពីខែមករា ឆ្នាំ២០២២ មក សហរដ្ឋអាមេរិកបាននាំចូលទំនិញពីរុស្ស៊ីតម្លៃ ២៤,៥១ពាន់លានដុល្លារ។

នៅឆ្នាំ២០២៤ សហរដ្ឋអាមេរិកបាននាំចូលជីពីរុស្សីប្រហែល ១,២៧ពាន់លានដុល្លារ ពោលគឺកើនឡើងបន្តិចពីចំនួន ១,១៤ពាន់លានដុល្លារ ក្នុងឆ្នាំ២០២១។ ហើយអាមេរិកបាននាំចូលសារធាតុអ៊ុយរ៉ានីញ៉ូម និងប្លាតូនីញ៉ូមចម្រាញ់ពីរុស្ស៊ី ក្នុងតម្លៃប្រហែល ៦២៤លានដុល្លារក្នុងឆ្នាំ២០២៤ ដោយធ្លាក់ចុះពី ៦៤៦ លានដុល្លារ ក្នុងឆ្នាំ ២០២១៕