​​មី​យ៉ាន់​ម៉ា៖ យោធា​សហភាព​មី​យ៉ាន់​ម៉ា​បាន​ដាក់​ការចោទប្រកាន់​ថ្មី​មួយ​កាលពី​ថ្ងៃ​ព្រហស្បតិ៍​ប្រឆាំង​នឹង​លោកស្រី Aung San Suu Kyi មេដឹកនាំ​ជាប់ឆ្នោត​របស់​ប្រទេស​នេះ ដែល​ខ្លួន​ត្រូវ​បាន​បណ្តេញ​ចេញ​ពី​តំណែង​ក្នុង​រដ្ឋប្រហារ​យោធា​កាលពី​ថ្ងៃ​ទី​១ ខែ​កុម្ភៈ​កន្លង​ទៅ​នេះ​។

​នៅ​ក្នុង​សន្និសីទ​សារព័ត៌មាន​មួយ​នៅ​រដ្ឋធានី​ណៃ​ពិដោ យោធា​បាន​អះ​អាង​ថា ​កាលពី​ចន្លោះ​ឆ្នាំ ២០១៧-២០១៨ លោកស្រី​ត្រូវ​បាន​គេ​ផ្តល់​ប្រាក់​ខុស​ច្បាប់​ចំនួន ៦០​ម៉ឺន​ដុល្លារ ​និង​ដុំ​មាស​មួយ​ចំនួន​ដោយ​សម្ព័ន្ធមិត្ត​នយោបាយ​គឺ​អតីត​អភិបាលក្រុង​យ៉ាង​ហ្គោ​ន លោក Phyo Min Thein​។​ អ្នក​នាំ​ពាក្យ​យោធា លោក​ឧ​ត្ត​ម​សេនីយ៍​ត្រី Zaw Min Tun បាន​និយាយ​ថា លោក Min Thein បាន​សារភាព​ថា​បាន​ប្រគល់​ប្រាក់​ និង​ដុំ​មាស​ទៅ​ឲ្យ​លោកស្រី Suu Kyi​។ ​ប៉ុន្តែ​លោក​មិនបាន​ផ្តល់​ភស្តុតាង​ណាមួយ ​ដើម្បី​គាំទ្រ​ការចោទប្រកាន់​នេះ​ទេ​។​

​ការ​ជាប់​ពាក់ព័ន្ធ​នឹង​អំពើ​ពុក​រលួយ​នេះ ត្រូវ​បាន​បញ្ជាក់​យ៉ាង​ច្បាស់​ពី​គោលបំណង​ ដើម្បី​បំបិទ​មាត់​លោកស្រី Suu Kyi ហើយ​ប្រហែលជា​ចោទប្រកាន់​លោកស្រី ​ពី​បទ​ឧក្រិដ្ឋ​ធ្ងន់ធ្ងរ​ទៀត​ផង​។​ គួរ​ឲ្យ​ដឹង​ថា ទាំង​លោកស្រី ទាំង​លោក​ប្រធានាធិបតី​ Win Myint ត្រូវ​បាន​ឃុំខ្លួន​ ក្រោម​ការ​ចោទ​ប្រកាន់​ពី​បទ​ល្មើស​កម្រិត​ស្រាល​ប្រឆាំង​មេដឹកនាំ​ទាំង​២៕​

អត្ថបទ៖ សុខមាន