អាជ្ញាធរសុខាភិបាលដែលមានមូលដ្ឋាននៅតំបន់ហ្កាហ្សា បាននិយាយកាលពីថ្ងៃអង្គារថា ចំនួនអ្នកស្លាប់ជនជាតិប៉ាឡេស្ទីននៅតំបន់ហ្កាហ្សាស្ទ្រីប ពីការវាយប្រហាររបស់អ៊ីស្រាអែល បានកើនឡើងដល់ ៦១.០២០នាក់ និង ១៥០.៦៧១នាក់ផ្សេងទៀត បានរងរបួស ចាប់តាំងពីថ្ងៃទី ០១ ខែតុលា ឆ្នាំ ២០២៣    មក។

អាជ្ញាធរនេះ បានបន្ថែមថា មនុស្ស ៩.៥១៩នាក់ បានស្លាប់ និង ៣៨.៦៣០នាក់ បានរងរបួស បន្ទាប់ពីបទឈប់បាញ់ បានដួលរលំ កាលពីថ្ងៃទី ១៨ ខែមីនា។

យោងតាមអ្នកនាំពាក្យអង្គភាពការពារជនស៊ីវិល លោក Mahmoud Basal ជនជាតិប៉ាឡេស្ទីន ៣០នាក់ ត្រូវបានសម្លាប់ ចាប់តាំងពីព្រឹកថ្ងៃអង្គារ នៅក្នុងការបាញ់ផ្លោង និងការបាញ់ប្រហាររបស់អ៊ីស្រាអែល ទៅលើតំបន់ហ្កាហ្សាស្ទ្រីប។

ទន្ទឹមនឹងនេះ អ្នកនាំពាក្យយោធាអ៊ីស្រាអែល លោក Avichay Adraee បាននិយាយនៅក្នុងសេចក្តីថ្លែងការណ៍មួយកាលពីថ្ងៃអង្គារថា កងកម្លាំងការពារអ៊ីស្រាអែល បានបន្តប្រតិបត្តិការរបស់ពួកគេប្រឆាំងនឹង   «អង្គការភេរវកម្ម» នៅទូទាំងតំបន់ហ្កាហ្សាស្ទ្រីប។

ប្រតិបត្តិការនេះ កើតឡើង នៅពេលដែលរថយន្តជំនួយចំនួន ៩៥គ្រឿង បានចូលទៅក្នុងតំបន់ហ្កាហ្សាស្ទ្រីបកាលពីថ្ងៃចន្ទ ដែលជំនួយភាគច្រើនត្រូវបានលួច ដោយសារតែអ្វីដែលក្រុមហាម៉ាសហៅថា «ភាពចលាចលផ្នែកសន្តិសុខ ដែលត្រូវបានបង្កឡើង ដោយកាន់កាប់របស់អ៊ីស្រាអែល»។ នេះបើយោងតាមការិយាល័យប្រព័ន្ធផ្សព្វផ្សាយដែលគ្រប់គ្រងដោយក្រុមហាម៉ាស នៅហ្កាហ្សាកាលពីថ្ងៃអង្គារ។

ការិយាល័យនេះ បាននិយាយថា តំបន់នេះ ត្រូវការរថយន្តសង្គ្រោះ និងប្រេងឥន្ធនៈយ៉ាងហោចណាស់  ៦០០គ្រឿង ក្នុងមួយថ្ងៃ ដើម្បីបំពេញតម្រូវការសុខភាព អាហារ និងសេវាកម្មផ្សេងៗ។