ប្រធានាធិបតីអ៊ីស្រាអែល លោក Isaac Herzog បាននិយាយថា អ៊ីស្រាអែលកំពុងខិតខំប្រឹងប្រែងធ្វើឲ្យ ប្រសើរឡើងនូវស្ថានភាពមនុស្សធម៌ នៅក្នុងតំបន់ហ្កាហ្សាស្ទ្រីប ដោយបានប្រគល់ជំនួយសង្គ្រោះចំនួន២៣.000តោន ក្នុងរយៈពេល ១០ថ្ងៃ កន្លងមកនេះ។

លោកបានប្រាប់សន្និសីទសារព័ត៌មានក្នុងអំឡុងពេលទៅទស្សនកិច្ចនៅប្រទេសឡាតវីថា៖«អ៊ីស្រាអែលបានធ្វើឲ្យប្រសើរឡើងគួរឲ្យកត់សម្គាល់នូវស្ថានភាពមនុស្សធម៌នៅហ្កាហ្សា ក្នុងរយៈពេល ១០ថ្ងៃ ចុងក្រោយនេះ។ យ៉ាងហោចណាស់ ជំនួយចំនួន ២៣.០០០តោន ត្រូវបានបញ្ជូនទៅទីនោះ ហើយ ៣០តោន ត្រូវបានផ្គត់ផ្គង់ ក្នុងរយៈពេល ២៤ម៉ោង ចុងក្រោយនេះ»។

យោងតាមប្រធានាធិបតីអ៊ីស្រាអែលរូបនេះ កញ្ចប់ជំនួយប្រហែល ១២០កញ្ចប់ ពីប្រទេសផ្សេងៗ ត្រូវបានទម្លាក់ពីលើអាកាស ទៅកាន់ដែនដីនេះ កាលពីថ្ងៃអង្គារ។ លោកបាននិយាយថា៖«ប្រព័ន្ធផ្គត់ផ្គង់ទឹក និងថាមពល ត្រូវបានជួសជុលឲ្យដំណើរការឡើងវិញ ខណៈពេលដែលចំណាប់ថ្នូររបស់យើង កំពុងអត់ឃ្លាន និងត្រូវបានឃុំខ្លួន ក្នុងស្ថានភាពដ៏ធ្ងន់ធ្ងរ»។

លោកបានសង្កត់ធ្ងន់ថា អាទិភាពរបស់អ៊ីស្រាអែល គឺការវិលត្រឡប់មកវិញនូវចំណាប់ខ្មាំងពីតំបន់ហ្កាហ្សា។ លោកបានលើកឡើងថា ការដោះលែងចំណាប់ថ្នូរ នឹងជំរុញឲ្យមានប្រក្រតីភាពឡើងវិញ នៅក្នុងតំបន់នេះ។ លោក Herzog បាននិយាយថា៖«នៅពេលដែលចំណាប់ថ្នូរ ត្រូវបានដោះលែង លក្ខខណ្ឌសម្រាប់បទឈប់បាញ់ នឹងកើតឡើង ដែលនឹងធានាបាននូវភាពប្រសើរឡើងនៃស្ថានការណ៍នៅតំបន់ហ្កា ហ្សា»។