ស្ថាប័នឃ្លាំមើលអនឡាញរបស់ប្រទេសអូស្ត្រាលី នៅថ្ងៃពុធ (ទី៦ ខែសីហា) នេះ បានចោទប្រកាន់បណ្ដាក្រុមហ៊ុនបច្ចេកវិទ្យាយក្ស ក្នុងនោះរួមមានទាំង Apple និង Google ផងដែរ ពីបទ «មិនអើពើ» ចំពោះមាតិការំលោភបំពានផ្លូវភេទកុមារដែលត្រូវបានចែករំលែកនៅលើបណ្ដាញសង្គមរបស់ក្រុមហ៊ុនទាំងនោះ។

គណៈកម្មការនៃស្ថាប័ន eSafety បានរកឃើញថា ក្រុមហ៊ុន Apple និងគេហទំព័រមើលវីដេអូ គឺ YouTube ដែលស្ថិតក្រោមការគ្រប់គ្រងរបស់ក្រុមហ៊ុន Google មិនបានតាមដានចំនួនរបាយការណ៍អ្នកប្រើប្រាស់ដែលពួកគេបានទទួល អំពីការរំលោភផ្លូវភេទលើកុមារ ហើយក៏មិនបានរៀបរាប់ពីរយៈពេលដែលក្រុមហ៊ុនត្រូវការ ដើម្បីឆ្លើយតបទៅនឹងរបាយការណ៍ទាំងនេះដែរ។

ស្នងការនៃស្ថាប័ន eSafety លោកស្រី Julie Inman Grant បាននិយាយថា៖ «នៅពេលដែលក្រុមហ៊ុនមិនបានតាមដានយ៉ាងដិតដល់ ចំពោះឧបករណ៍ផ្ទាល់ខ្លួនរបស់ពួកគេទេនោះ ពួកគេមិនបានផ្តល់អាទិភាពដល់ការការពារកុមារនោះឡើយ ហើយហាក់បីដូចជាកំពុងធ្វើមិនដឹងមិនឮ ចំពោះឧក្រិដ្ឋកម្មដែលកើតឡើងលើសេវាកម្មរបស់ក្រុមហ៊ុន»។

ហើយលោកស្រីបានបន្ថែមថា ក្រុមហ៊ុនបច្ចេកវិទ្យាមិនបាន «ចាត់វិធានការឲ្យបានច្រើនគ្រប់គ្រាន់ ដើម្បីលើកកម្ពស់ និងកែលម្អកិច្ចប្រឹងប្រែងរបស់ពួកគេឡើយ» ចាប់តាំងពីលោកស្រីបានសួរទៅក្រុមហ៊ុនទាំងនោះ កាលពី ៣ឆ្នាំមុន។

របាយការណ៍របស់ស្ថាប័ននេះ ក៏បានរកឃើញដែរថា ក្រុមហ៊ុនជាច្រើន រួមមាន Apple, Google, Microsoft និង Skype មិនប្រើប្រាស់ឧបករណ៍ ដើម្បីស្វែងរកយ៉ាងសកម្មនូវមាតិការរំលោភបំពានផ្លូវភេទលើកុមារ តាមប្រព័ន្ធអ៊ិនធឺណិតនោះឡើយ។

តែយ៉ាងណាក្ដី អ្នកនាំពាក្យរបស់ក្រុមហ៊ុន Google បានប្រាប់ថា ការរកឃើញរបស់គណៈកម្មាការ ត្រូវបានពឹងលើ «រង្វាស់សេចក្ដីរាយការណ៍ មិនមែនការអនុវត្តសុវត្ថិភាពតាមប្រព័ន្ធអ៊ីនធឺណិតនោះទេ»៕