ប្រធានាធិបតីអាមេរិកលោក Donald Trump នឹងធ្វើជាម្ចាស់ផ្ទះទទួលមេដឹកនាំនៃប្រទេសអាមេនី និងអាស៊ែបៃហ្សង់ សម្រាប់កិច្ចចរចាសន្តិភាព នៅសេតវិមាន នាថ្ងៃទី៨ ខែសីហា។ នេះបើតាមការឲ្យដឹងពីមន្ត្រីអាមេរិកម្នាក់ ដែលបាននិយាយទៅកាន់សារព័ត៌មាន Reuters។

មន្ត្រីរូបនេះបានប្រាប់ថា វាអាចទៅរួចដែលក្របខណ្ឌនៃកិច្ចព្រមព្រៀងសន្តិភាព អាចត្រូវបានប្រកាសនៅក្នុងកិច្ចប្រជុំ នាថ្ងៃទី៨ ខែសីហានោះ។ កិច្ចចរចាសន្តិភាពនៃប្រទេសទាំង២ ត្រូវបានសារព័ត៌មាន Washington Post រាយការណ៍ដំបូងគេ។

គួរបញ្ជាក់ថា ប្រទេសទាំង២ ដែលបានទទួលឯករាជ្យពីសហភាពសូវៀតក្នុងឆ្នាំ១៩៩១ បានជាប់ក្នុងជម្លោះជាមួយគ្នា តាំងពីចុងទសវត្សរ៍ឆ្នាំ១៩៨០ មក នៅពេលដែល Nagorno-Karabakh ជាតំបន់របស់អាស៊ែបៃហ្សង់ ដែលមានប្រជាជនភាគច្រើនជាជនជាតិអាមេនី បានផ្ដាច់ខ្លួនចេញពីអាស៊ែបៃហ្សង់ ដោយមានការគាំទ្រពីអាមេនី។

អាស៊ែបៃហ្សង់បានដណ្តើមកាន់កាប់តំបន់ Karabakh វិញ នៅឆ្នាំ២០២៣ ដោយបានជំរុញឲ្យជនជាតិអាមេនីចំនួន ១០០.០០០នាក់ភៀសខ្លួនទៅកាន់ប្រទេសអាមេនី។ កាលពីខែមីនា ភាគីទាំង២ បានបញ្ជាក់ថា ពួកគេបានព្រមព្រៀងលើឯកសារនៃសេចក្តីព្រាងកិច្ចព្រមព្រៀងសន្តិភាព ប៉ុន្តែចាប់តាំងពីពេលនោះមក វឌ្ឍនភាពមានសភាពមិនទៀងទាត់ និងយឺតយ៉ាវ។ មេដឹកនាំនៃប្រទេសទាំង២ បានជួបគ្នាកាលពីខែកក្កដានៅទីក្រុង Abu Dhabi ប្រទេសអារ៉ាប់រ៉ូម ដើម្បីបើកការពិភាក្សា៕