នៅក្នុងសុន្ទរកថាលើកញ្ចក់ទូរទស្សន៍កាលពីថ្ងៃអង្គារ មេដឹកនាំក្រុមឧទ្ទាមហេសបូឡាលោក Naim Qassem បានគំរាមអ៊ីស្រាអែលដោយផ្ទាល់ ដោយលោកនិយាយថា មីស៊ីលនឹងធ្លាក់លើទឹកដីអ៊ីស្រាអែល បើសិនជាពួកគេហ៊ានចាប់ផ្តើមសង្រ្គាមឡើងវិញនៅប្រទេសលីបង់ ។

លោក Qassem និយាយថា ក្រុមហេសបូឡា កងទ័ពលីបង់ និងប្រជាពលរដ្ឋលីបង់ នឹងការពារខ្លួនពួកគេ បើសិនជាអ៊ីស្រាអែលចូលរួមការឈ្លានពានទ្រង់ទ្រាយធំ ។

លោកថា ការការពារនេះ នឹងនាំឲ្យមានមីស៊ីលធ្លាក់លើអង្គភាពអ៊ីស្រាអែល ហើយសន្តិសុខទាំងអស់ដែលពួកគេបានបង្កើតឡើងក្នុងរយៈពេលជាង ៨ខែ នឹងត្រូវរលាយក្នុងរយៈពេល ១ម៉ោង ។

លោក Qassem បន្តទៀតថា វាគឺជាផលប្រយោជន៍របស់អ៊ីស្រាអែលមិនសម្រេចបង្កការឈ្លានពានទ្រង់ទ្រាយធំ ពីព្រោះថា បើសិនជាពួកគេសម្រេចចិត្តបង្កការឈ្លានពានទ្រង់ទ្រាយធំ ក្រុមតស៊ូនឹងការពារខ្លួន ហើយកងទ័ពនឹងការពារខ្លួន ហើយពលរដ្ឋនឹងចេញការពារខ្លួន ហើយការការពារមួយនេះ នឹងនាំឲ្យមានមីស៊ីលធ្លាក់លើទឹកដីអ៊ីស្រាអែល ។

ខណៈពេលនោះដែរ គណៈរដ្ឋមន្ត្រីលីបង់ បានប្រគល់ភារកិច្ចដល់កងទ័ពឲ្យរៀបចំផែនការបង្កើតអង្គភាពផ្តាច់មុខរបស់រដ្ឋលើអាវុធនៅចុងឆ្នាំនេះ ក្នុងការប្រជែងជាមួយក្រុមហេសបូឡា ដែលបានច្រានចោលការអំពាវនាវឲ្យរំសាយអាវុធ ចាប់តាំងពីសង្គ្រាមដ៏បំផ្លិចបំផ្លាញកាលពីឆ្នាំមុនជាមួយអ៊ីស្រាអែល ៕