នៅទីក្រុង Kigali ប្រទេសរ៉្វាន់ដា ការសន្ទនាគ្នាជុំវិញការមកដល់របស់ជនអន្តោប្រវេសន៍ពីសហរដ្ឋអាមេរិក បង្កឲ្យមានទស្សនៈ ២ ទាំងសុទិដ្ឋិនិយម និងក្តីកង្វល់ ។ 

ពលរដ្ឋមួយចំនួននិយាយថា វាអាចជាឱកាសរីកចម្រើន ។ លោក Ishimwe Letitie គឺជាពលរដ្ឋមួយរូបរស់នៅទីក្រុង Kigali និយាយថា ជាទូទៅ ក្នុងនាមជាពលរដ្ឋរ៉្វាន់ដា ពួកយើងជឿថា មនុស្សមកពីទីកន្លែងដូចជាសហរដ្ឋអាមេរិកអាចនឹងមានចំណេះដឹងសម្បូរបែបដែលអាចផ្តល់អត្ថប្រយោជន៍ដល់ប្រទេសរបស់ពួកយើង ។

ប៉ុន្តែពលរដ្ឋខ្លះទៀតមានការប្រុងប្រយ័ត្នជាងនេះ ។ លោក Eric Nsanzimana គឺជាពលរដ្ឋមួយរូបរស់នៅក្នុងទីក្រុង Kigali ដែរនោះ និយាយថា ប្រទេសរ៉្វាន់មានមនុស្សគ្មានការងារធ្វើច្រើនណាស់ទៅហើយ ឃើញថាបញ្ហានេះនៅតែមាន វានឹងក្លាយជាការលំបាកមួយ បើសិនជារ៉្វាន់ដា ត្រូវគាំទ្រជនអន្តោប្រវេសន៍ទាំងអស់នេះ លុះត្រាតែសហរដ្ឋអាមេរិកផ្តល់ការឧបត្ថម្ភផ្នែកហិរញ្ញវត្ថុ ដើម្បីទ្រទ្រង់ពួកគេ វាអាចជាបន្ទុកមួយ ។

គួរឲ្យដឹងថា សហរដ្ឋអាមេរិក និងរ៉្វាន់ដា បានព្រមព្រៀងគ្នាឲ្យប្រទេសនៅអាហ្វ្រិកមួយនេះ ទទួលយកជនអន្តោប្រវេសន៍ ២៥០នាក់ ដែលនិរទេសខ្លួនចេញពីសហរដ្ឋអាមេរិក ស្របពេលដែលរដ្ឋបាលរបស់លោកប្រធានាធិបតីសហរដ្ឋអាមេរិក Donald Trump ចាត់វិធានការរឹងមាំចំពោះការធ្វើអន្តោប្រវេសន៍ ។

កិច្ចព្រមព្រៀងដែលត្រូវបានរាយការណ៍ដំបូងដោយទីភ្នាក់ងាររ៉យទ័រនេះ ត្រូវបានចុះហត្ថលេខាដោយក្រុមមន្រ្តីសហរដ្ឋអាមេរិក និងក្រុមមន្រ្តីរ៉្វាន់ដា នៅទីក្រុង Kigali កាលពីខែមិថុនា កន្លងទៅ ៕