តុលាការនៅទីក្រុង Kaliningrad របស់រុស្ស៊ី បាននិយាយនៅថ្ងៃពុធនេះថា បុរសម្នាក់ដែលត្រូវបានចោទប្រកាន់ពីបទបញ្ជូនព័ត៌មានសម្ងាត់អំពីផ្កាយរណបរបស់រុស្ស៊ី ទៅឲ្យសហរដ្ឋអាមេរិក ត្រូវបានចាប់ខ្លួនពីបទសង្ស័យថា ក្បត់ជាតិ ហើយត្រូវបានឃុំខ្លួនបណ្តោះអាសន្ន។

នៅក្នុងសេចក្តីថ្លែងការណ៍មួយនៅលើបណ្តាញសង្គម Telegram តុលាការបានកំណត់អត្តសញ្ញាណជនសង្ស័យត្រឹមតែឈ្មោះ «O» ហើយបាននិយាយថា រូបគេ គឺជាអតីតបុគ្គលិករបស់ក្រុមហ៊ុនដែលផលិតម៉ាស៊ីនអេឡិចត្រូនិចសម្រាប់ផ្កាយរណបអវកាស។

តុលាការបានបន្ថែមថា បុរសនេះ ត្រូវបានគេសង្ស័យពីការប្រមូល និងរក្សាទុកព័ត៌មានអំពីបច្ចេកវិទ្យារបស់ក្រុមហ៊ុន ក្នុងនាមសេវាកម្មស៊ើបការណ៍សម្ងាត់របស់សហរដ្ឋអាមេរិក នៅចន្លោះខែកក្កដា ឆ្នាំ ២០២១ និងខែធ្នូ ឆ្នាំ ២០២៣។

តុលាការបានបញ្ជាក់ថា បុរសនេះ ត្រូវបានឃុំខ្លួន រហូតដល់ថ្ងៃទី ៣០ ខែកញ្ញា។ ការចោទប្រកាន់ពីបទក្បត់ជាតិកម្រិតខ្ពស់ អាចកាត់ទោសឲ្យជាប់ពន្ធនាគារអស់មួយជីវិត។