បើយោងតាមបុគ្គល ២រូបដែលដឹងអំពីផែនការនេះ បានប្រាប់ថា ប្រធានាធិបតីកូរ៉េខាងត្បូងថ្មី លោក Lee Jae-myung នឹងធ្វើជាម្ចាស់ផ្ទះទទួលមេដឹកនាំកំពូលរបស់វៀតណាម លោក To Lam ក្នុងដំណើរទស្សនកិច្ច នាសប្តាហ៍ក្រោយ ខណៈដែលមេដឹកនាំទាំង២ មានបំណងជំរុញកិច្ចសហប្រតិបត្តិការបច្ចេកវិទ្យា ស្របពេលមានភាពតានតឹងពាណិជ្ជកម្មកសកល ដែលអាចប៉ះពាល់ដល់ទំនាក់ទំនងរបស់ប្រទេសទាំង២។

ទិន្នន័យរបស់រដ្ឋាភិបាលវៀតណាម បង្ហាញថា ក្រុមហ៊ុនកូរ៉េខាងត្បូងជាអ្នកវិនិយោគជាប្រពៃណីធំជាងគេក្នុងប្រទេសអាស៊ីអាគ្នេយ៍មួយនេះ ដោយបង្ហូរទឹកប្រាក់ចូលចំនួន ៩២ពាន់លានដុល្លារអាមេរិក នៅចុងឆ្នាំ២០២៤ ដែលភាគច្រើនទៅលើការវិនិយោគរោងចក្រ។

ដោយនិយាយក្នុងលក្ខខណ្ឌមិនបញ្ចេញឈ្មោះ ប្រភពបានឲ្យដឹងថា លោក Lam ត្រូវបានគេរំពឹងថា នឹងទៅដល់នៅថ្ងៃទី១០ ខែសីហា សម្រាប់ព្រឹត្តិការណ៍ ៤ថ្ងៃ ដែលជាទស្សនកិច្ចផ្លូវរដ្ឋលើកដំបូង គិតចាប់តាំងពីលោក Lee ចូលកាន់តំណែង កាលពីខែមិថុនា ខណៈមិនទាន់មានការប្រកាស អំពីការធ្វើដំណើរនេះនៅឡើយទេ។ ម្នាក់ក្នុងចំណោមប្រភពទាំងនោះ បានប្រាប់ថា ភាពមិនប្រាកដប្រជានៃពាណិជ្ជកម្មសកល នឹងក្លាយជាផ្នែកនៃកិច្ចពិភាក្សាក្នុងទីក្រុងសេអ៊ូល នាសប្តាហ៍ក្រោយ។

ព័ត៌មាននៃទស្សនកិច្ចនេះ កើតមានឡើងបន្ទាប់ពីរដ្ឋបាលរបស់ប្រធានាធិបតីអាមេរិក លោក Trump បានអនុម័តពន្ធថ្មី កាលពីសប្តាហ៍មុនលើទំនិញពីប្រទេសរាប់សិប ក្នុងនោះរួមមានទាំងកូរ៉េខាងត្បូង និងវៀតណាមផងដែរ។

ការិយាល័យប្រធានាធិបតីកូរ៉េខាងត្បូង បានបដិសេធមិនធ្វើអត្ថាធិប្បាយឡើយ ហើយក្រសួងការបរទេសវៀតណាម ក៏មិនបានឆ្លើយតបភ្លាមៗនោះដែរ ចំពោះសំណើសុំការអត្ថាធិប្បាយ ពាក់ព័ន្ធនឹងព័ត៌មាននេះ៕