កាហ្សាក់ស្ថាន៖ ក្រសួងការពារជាតិរុស្ស៊ីបាននិយាយកាលពីថ្ងៃព្រហស្បតិ៍ថា កងទ័ពរបស់សម្ព័ន្ធសន្តិសុខដឹកនាំដោយប្រទេសរុស្ស៊ី កំពុងត្រៀមរៀបចំដើម្បីដកចេញពីប្រទេសកាហ្សាក់ស្ថាន។ ក្រសួងនិយាយថា កងទ័ពនៅក្នុងប្រទេសកាហ្សាក់ស្ថានកំពុងរៀបចំឧបករណ៍សម្រាប់ការដឹកជញ្ជូន និងប្រគល់ឲ្យស្ថាប័នរដ្ឋដែលពួកគេបានការពារកងកម្លាំងក្នុងតំបន់។
រដ្ឋមន្ត្រីក្រសួងការពារជាតិរុស្ស៊ីលោក Sergei Shoigu បានរាយការណ៍ទៅប្រធានាធិបតីលោក Vladimir Putin ថា កងទ័ពនឹងដកចេញនៅថ្ងៃទី១៩ ខែមករា។ លោក Putin បាននិយាយថា វាគឺជាប្រតិបត្តិការលើកដំបូងក្នុងសកម្មភាពបែបនេះសម្រាប់កងទ័ពអង្គការសន្ធិសញ្ញាសន្តិសុខរួម (CSTO) ហើយកងទ័ពបានដើរតួនាទីយ៉ាងសំខាន់ ក្នុងការធ្វើឱ្យស្ថានការណ៍នៅប្រទេសកាហ្សាក់ស្ថានមានស្ថិរភាព។ ការដកកងទ័ពធ្វើឡើងត្រឹមតែមួយសប្តាហ៍ប៉ុណ្ណោះ បន្ទាប់ពីពួកគេត្រូវបានដាក់ពង្រាយទៅកាន់អតីតប្រទេសសូវៀតមួយនេះ តាមសំណើរបស់ប្រធានាធិបតីរបស់ប្រទេសដែលកំពុងតែស្វែងរកការបង្ក្រាប ការតវ៉ាទ្រង់ទ្រាយធំដោយហិង្សា។ បាតុកម្មបានចាប់ផ្តើមចាប់តាំងពីថ្ងៃទី២ ខែមករា នៅភាគខាងលិចប្រទេសកាហ្សាក់ស្ថាន បន្ទាប់ពីមានកំហឹងរាលដាលជុំវិញការកើនឡើងខ្លាំងនៃតម្លៃប្រេងឥន្ធនៈ។
ក្រុមអ្នកតវ៉ាបានសម្រុកចូលអគាររដ្ឋាភិបាល និងបានដុតបំផ្លាញ ហើយមនុស្សរាប់សិបនាក់ត្រូវបានសម្លាប់នៅក្នុងការប៉ះទង្គិចគ្នា ជាមួយកងកម្លាំងសន្តិសុខរបស់ប្រទេស។ ប្រធានាធិបតីលោក Kassym-Jomart Tokayev បានដាក់កំហុសភាពវឹកវរលើភេរវករដែលគាំទ្រដោយបរទេស ហើយបានស្នើសុំជំនួយពីអង្គការសន្ធិសញ្ញាសន្តិសុខរួម ដែលជាសម្ព័ន្ធមិត្តយោធាដឹកនាំដោយរុស្ស៊ីនៃអតីតរដ្ឋចំនួនប្រាំមួយរបស់សូវៀត។ ប្លុកនេះបានបញ្ជូនទាហានជាង ២,០០០នាក់ទៅកាន់ប្រទេសកាហ្សាក់ស្ថានកាលពីសប្តាហ៍មុន៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
