មន្ត្រីអ៊ីស្រាអែល ៣នាក់ បានបង្ហើបឲ្យដឹងថា ក្នុងអំឡុងពេលកិច្ចប្រជុំដ៏តានតឹងរយៈពេល ៣ម៉ោង នាយករដ្ឋមន្ត្រីអ៊ីស្រាអែល លោក Benjamin Netanyahu បានប្រឈមនឹងការជំទាស់ពីប្រមុខយោធា ជុំវិញសំណើររបស់លោក ក្នុងការដណ្តើមកាន់កាប់តំបន់នៅសេសសល់នៃដែនដីហ្កាហ្សា ដែលខ្លួនមិនទាន់បានគ្រប់គ្រង។

ប្រភពទាំងនេះ បានផ្ដល់ព័ត៌មានអំពីកិច្ចប្រជុំនោះថា នាយសេនាធិការយោធា លោកឧត្តមសេនីយ៍ឯក Eyal Zamir បានរំលឹកលោកនាយករដ្ឋមន្ត្រីថា ការដណ្ដើមកាន់កាប់តំបន់ហ្កាហ្សាដែលនៅសេសសល់ អាចធ្វើឲ្យយោធាជាប់នៅក្នុងដែនដីនេះ ជាទីដែលខ្លួនបានដកទ័ពចេញកាលពី ២ទសវត្សរ៍មុន ហើយអាចនាំឲ្យមានគ្រោះថ្នាក់ដល់ចំណាប់ថ្នូរដែលស្ថិតនៅក្រោមការឃុំខ្លួននៅទីនោះ។

យោធាអ៊ីស្រាអែល បានប្រាប់ថា ខ្លួនគ្រប់គ្រង ៧៥ភាគរយនៃតំបន់ហ្កាហ្សារួចហើយ បន្ទាប់ពីមានសង្រ្គាមជិត ២ឆ្នាំ ដែលបានចាប់ផ្តើមនៅពេលដែលក្រុមសកម្មប្រយុទ្ធហាម៉ាស វាយប្រហារសហគមន៍ភាគខាងត្បូងអ៊ីស្រាអែល ក្នុងខែតុលា ឆ្នាំ២០២៣។

ភាគច្រើននៃតំបន់ឆ្នេរដែលមានមនុស្សរស់នៅច្រើនកកកុញ ត្រូវបានបំផ្លិចបំផ្លាញខ្ទេចខ្ទី នៅក្នុងសង្គ្រាមនេះ ដែលបានបំផ្លាញផ្ទះ សាលារៀន វិហារឥស្លាម និងមន្ទីរពេទ្យ។ ប្រជាជនភាគច្រើនត្រូវបានផ្លាស់ទីលំនៅជាច្រើនដង ហើយក្រុមជំនួយប្រាប់ថា អ្នកស្រុកកំពុងស្ថិតក្នុងភាពអត់ឃ្លាន។

យោធាដែលចោទប្រកាន់ក្រុមហាម៉ាសថា មានប្រតិបត្តិការក្នុងចំណោមជនស៊ីវិលនេះ ពេលខ្លះបានគេចពីតំបន់ដែលចារកម្មប្រាប់ពីទីកន្លែងចំណាប់ថ្នូរត្រូវបានឃុំ ហើយអតីតចំណាប់ថ្នូរខ្លះ បាននិយាយថា ពួកអ្នកចាប់ខ្លួនទាំងនោះ បានគំរាមសម្លាប់ពួកគេ ប្រសិនបើកងកម្លាំងអ៊ីស្រាអែលចូលទៅកៀក៕