ក្រសួងការពារជាតិរុស្ស៊ី នៅថ្ងៃពុធ (ទី៦ ខែសីហា) នេះ បានប្រាប់ឲ្យដឹងថា កងទ័ពជើងទឹករុស្ស៊ី និងចិន បានហ្វឹកហាត់យុទ្ធវិធីតាមប្រមាញ់ និងកម្ទេចនាវាមុជទឹកសត្រូវ នៅសមុទ្រជប៉ុន ដោយការហាត់សមនេះកើតមានឡើង ក្រោយប៉ុន្មានថ្ងៃបន្ទាប់ពីប្រធានាធិបតីអាមេរិក លោក Donald Trump បាននិយាយថា លោកបានបញ្ជាឲ្យផ្លាស់ទីនាវាមុជទឹកនុយក្លេអ៊ែររបស់អាមេរិកចំនួន ២គ្រឿងទៅកាន់តែកៀកនឹងប្រទេសរុស្ស៊ី។

រុស្ស៊ីបានបញ្ជាក់ថា សមយុទ្ធនេះមានការចូលរួមពីយន្តហោះប្រឆាំងនាវាមុជទឹករបស់ចិន Y-8 និងយន្តហោះ Il-38 មកពីកងនាវាប៉ាស៊ីហ្វិករបស់រុស្ស៊ី ក៏ដូចជាក្រុមឧទ្ធម្ភាគចក្រផងដែរ។

ក្រសួងការពារជាតិបានឲ្យដឹងថា៖ «ដោយសារការធ្វើសកម្មភាពរួមប្រកបដោយប្រសិទ្ធភាព នាវាមុជទឹកសត្រូវ ត្រូវបានរកឃើញភ្លាមៗ និងត្រូវបានក្លែងឲ្យដូចជាពិតថា ត្រូវបានបំផ្លាញចោល។ បន្ទាប់ពីអនុវត្តប្រតិបត្តិការប្រឆាំងនាវាមុជទឹកនេះ ក្រុមនាវិកនៃនាវារុស្ស៊ី និងចិន បានថ្លែងអំណរគុណគ្នាទៅវិញទៅមក សម្រាប់ការសម្រេចបាននូវការងារប្រកបដោយផ្លែផ្ការបស់ពួកគេ»។

សមយុទ្ធប្រឆាំងនាវាមុជទឹក គឺជាផ្នែកនៃសមយុទ្ធដ៏ធំរបស់កងទ័ពជើងទឹករុស្ស៊ី-ចិន ដែលមានជាបន្តបន្ទាប់ក្នុងសប្តាហ៍កន្លងមក។ ប្រទេសទាំង២ ដែលបានចុះហត្ថលេខាលើភាពជាដៃគូយុទ្ធសាស្ត្រ «គ្មានដែនកំណត់» ភ្លាមៗមុនពេលរុស្ស៊ីចាប់ផ្ដើមសង្រ្គាម នៅអ៊ុយក្រែន ក្នុងឆ្នាំ២០២២ តែងធ្វើសមយុទ្ធយោធាជាទៀងទាត់ ដើម្បីហាត់សមការសម្របសម្រួល រវាងកងកម្លាំងប្រដាប់អាវុធរបស់ភាគីទាំង២ និងបញ្ជូនសញ្ញារារាំងដល់សត្រូវ៕