ជំនួយការគោលនយោបាយបរទេសវិមានក្រឹមឡាំងលោក Yuri Ushakov និយាយនៅថ្ងៃពុធនេះថា ជំនួបរវាងប្រធានាធិបតីរុស្ស៊ីលោក Vladimir Putin និងប្រេសេតពិសេសសហរដ្ឋអាមេរិកលោក Steve Witkoff មានលក្ខណៈ “ស្ថាបនា និងមានសារៈប្រយោជន៍ច្រើន” ។

លោក Witkoff មាននូវកិច្ចប្រជុំរយៈពេលប្រហែល ៣ម៉ោងជាមួយលោក Putin នៅឯវិមានក្រឹមឡាំង រយៈពេល ២ថ្ងៃប៉ុណ្ណោះ មុនថ្ងៃផុតកំណត់នៃឱសានវាទដាក់ចេញដោយលោកប្រធានាធិបតី Donald Trump ឲ្យរុស្ស៊ីយល់ព្រមនឹងសន្តិភាពនៅអ៊ុយក្រែន បើពុំដូច្នោះទេពួកគេនឹងប្រឈមទណ្ឌកម្មថ្មី ។

លោក Ushakov បាននិយាយប្រាប់សារព័ត៌មានរុស្ស៊ីថា ភាគីទាំង ២បានពិភាក្សាលើជម្លោះនៅអ៊ុយក្រែន ហើយនិងសក្តានុពលសម្រាប់ធ្វើឲ្យល្អប្រសើរឡើងទំនាក់ទំនងសហរដ្ឋអាមរិក-រុស្ស៊ី ។ លោកនិយាយថា ទីក្រុងម៉ូស្គូ បានទទួលសញ្ញាច្បាស់លាស់ពីលោក Trump និងបានបញ្ជូនសារត្រឡប់ទៅវិញ ។

លោក Ushakov និយាយបន្តថា វាគឺជាកិច្ចពិភាក្សាប្រកបដោយសារៈប្រយោជន៍ និងស្ថាបនាច្រើន ។ ពេលឈានដល់ប្រធានបទ ទី ១ គឺវិបត្តិអ៊ុយក្រែន ហើយទី ២ គឺទស្សនីយភាពនៃលទ្ធភាពអភិវឌ្ឍន៍កិច្ចសហប្រតិបត្តិការយុទ្ធសាស្រ្តរវាងរុស្ស៊ី និងសហរដ្ឋអាមេរិក ។ នៅភាគីខាងពួកយើង ជាពិសេសលើបញ្ហាអ៊ុយក្រែន សញ្ញាមួយចំនួនត្រូវបានបញ្ជូន ហើយសញ្ញាឆ្លើយតបត្រូវបានទទួលផងដែរពីលោកប្រធានាធិបតី Trump ។

លោកបន្តទៀតថា ស្ថានភាពបច្ចុប្បន្នគឺថា លោកប្រធានាធិបតី Putinរបស់ពួកយើង មាននូវព័ត៌មានពេញលេញច្បាស់លាស់ រួមទាំងសញ្ញារបស់ពួកយើង និងសញ្ញាពីលោក Trump ស្របពេលដែលលោក Trump ពុំបាននិយាយប្រាប់ពីលទ្ធផលនៃជំនួបនេះក៏ដោយ ។ ដូច្នេះហើយ លោកសូមបដិសេធន៍មិនធ្វើសេចក្តីអត្ថាធិប្បាយលម្អិតបន្ថែមទៀត ហើយនិងរង់ចាំពេលដែលលោកប្រេសេសពិសេសអាមេរិក Witkoff អាចរាយការណ៍ដល់លោក Trump ពីកិច្ចសន្ទានានៅថ្ងៃនេះ ៕