ស្ថាប័នស្ទង់មតិឈានមុខគេនៅទីក្រុងគីវ កាលពីថ្ងៃពុធ (០៦ សីហា) បាននិយាយថា ទំនុកចិត្តសាធារណៈជនលើលោកប្រធានាធិបតីអ៊ុយក្រែន Volodymyr Zelenskiy បានធ្លាក់ដល់កម្រិតទាបបំផុតរយៈពេល ៦ខែ បន្ទាប់ពីការតវ៉ាដ៏កម្រក្នុងសម័យសង្គ្រាម ប្រឆាំងនឹងវិធានការទប់ស្កាត់អំណាចនៃក្រុមឃ្លាំមើលអំពើពុករលួយ។

ការស្ទង់មតិដែលធ្វើឡើងដោយវិទ្យាស្ថានសង្គមវិទ្យាអន្តរជាតិគីវ ហៅកាត់ថា KIIS គឺជាលើកដំបូងហើយរបស់ស្ថាប័នស្ទង់មតិអ៊ុយក្រែនដ៏សំខាន់មួយ ក្នុងការវាស់ស្ទង់អារម្មណ៍សាធារណៈ ចាប់តាំងពីលោក Zelenskiy បង្កឱ្យមានកំហឹង ជុំវិញការបញ្ជូនទីភ្នាក់ងារប្រឆាំងអំពើពុករលួយ ឱ្យទៅនៅក្រោមក្រសួងយុត្តិធម៌។

ប្រជាជនអ៊ុយក្រែនរាប់ពាន់នាក់បានប្រមូលផ្តុំគ្នាតវ៉ាក្នុងទីក្រុងគីវ និងទីក្រុងផ្សេងទៀតកាលពីចុងខែមុន ប្រឆាំងនឹងវិធានការទប់ស្កាត់ឯករាជ្យភាពបែបនេះ។ ការស្ទង់មតិ KIIS ដែលចាប់ផ្តើមមួយថ្ងៃបន្ទាប់ពីការបោះឆ្នោតដ៏ចម្រូងចម្រាសមួយនៅថ្ងៃទី២២ ខែកក្កដា បានរកឃើញថា អត្រា ៥៨% នៃប្រជាជនអ៊ុយក្រែនបច្ចុប្បន្ន ជឿជាក់លើលោក Zelenskiy ដែលជាការធ្លាក់ចុះពីកម្រិតខ្ពស់រយៈពេល ១៨ខែគឺ ៧៤% ក្នុងខែឧសភា និងពីតួលេខ ៦៧% នៅក្នុងខែកុម្ភៈ ដល់ខែមីនា។

KIIS បានរកឃើញថា អ្នកដែលមិនទុកចិត្តលើលោក Zelenskiy បានលើកឡើងពីអំពើពុករលួយ (២១%) និងកិច្ចការដោះស្រាយសង្រ្គាម (២០%) របស់លោកថាជាមូលហេតុពីរចម្បងគេ លើការបាត់បង់ទំនុកចិត្តនេះ។ ចំណាត់ការប្រឆាំងនឹងអាជ្ញាធរប្រឆាំងអំពើពុករលួយកាលពីខែមុននេះ បានជំរុញឱ្យមានការមិនសប្បាយចិត្តជាពិសេស ដោយសារអ្វីដែលអ្នករិះគន់ពណ៌នាថាជាល្បឿន និងខ្វះតម្លាភាព ដែលវិធានការនោះត្រូវបានអនុម័ត៕